Трамп Синдзо Aбэ, Нарендра Моди ва Скотт Моррисонни «Фахрий легион» ордени билан тақдирлади
AҚШнинг амалдаги президенти Дональд Трамп Япониянинг собиқ бош вазири Синдзо Aбени, шунингдек, Ҳиндистон ва Aвстралия ҳукумат раҳбарлари Нарендра Моди ва Скотт Моррисонни AҚШ ҳарбий «Фахрий Легион» ордени билан тақдирлади. Президентнинг миллий хавфсизлик бўйича ёрдамчиси Роберт О’Брайен мукофотларни тегишли мамлакатлар элчиларига топширди. Таъкидланишича, Aбэ «эркин ва очиқ Ҳинд-Тинч океани минтақасидаги етакчилиги ва қарашлари учун», Моди — «Aмерика-Ҳиндистон стратегик шериклигини мустаҳкамлашда етакчилиги учун», Моррисон эса «глобал масалаларга тезкор жавоб бериш ва жамоавий хавфсизликни тарғиб қилишда етакчилиги учун» ушбу орден билан тақдирланишди. — АҚШ Миллий хавфсизлик кенгашининг Twitter’даги саҳифаси.
Туркия ҳукумати меҳмонхоналарда янги йил байрамларини ўтказишни тақиқлади
Туркия ҳукумати янги йил байрамини ўтказиш учун меҳмонхоналарда ҳар қандай кўнгилочар дастурларни ўтказишни тақиқлади. «31 декабрь соат 21:00 дан 4 январь соат 5:00 гача мамлакатда комендантлик соати жорий этилди. Бу вақт мобайнида меҳмонхоналарда кўнгилочар дастурларни ташкил этиш тақиқланади. Жонли мусиқа, шу жумладан Djларнинг чиқишлари тақиқланади. Шунингдек, 22:00 дан кейин ҳар қандай мусиқий трансляция тақиқланади», — дейилади мамлакат Ички ишлар вазирлигининг баёнотида. Таъкидланишича, ушбу давр мобайнида меҳмонхоналарда ижтимоий масофага, айниқса овқатланиш вақтида эътибор кучайтирилади. Назорат органлари текширишни кучайтиради. — Туркия ички ишлар вазирлиги.
Тайванда саккиз ой ичида илк бор коронавирус ҳолати аниқланди
Тайванда саккиз ой ичида илк бор мамлакат аҳолисида коронавирус инфекцияси топилди. Аниқроғи касалланиш ҳолати чет эллик учувчидан бошланди. COVID-19 Янги Зеландиядан келган учувчи билан яқин алоқада бўлган аёлда топилди. Маълумотларга кўра, ноябрь ойи охирида учувчи иккита рейсни амалга ошириб (Филиппин ва AҚШга), Тайванга қайтиб келган. Бу шахсда коронавирус аниқланганидан сўнг, аёл билан алоқада бўлганлигини маҳаллий ҳокимиятдан яширган. Бунинг учун унга 10,7 минг доллар миқдорида жарима солинади. — Focus Taiwan.
BioNTech 6 ҳафта ичида янги COVID-19 штаммига қарши вакцина яратиши мумкин
BioNTech раҳбари Угур Шахиннинг айтишича, унинг компанияси, агар керак бўлса, янги COVID-19 штаммига қарши вакцинани олти ҳафта ичида тақдим этиши мумкин. «Техник жиҳатдан олти ҳафта ичида янги вакцинани жорий этишимиз мумкин», — деди Шахин. У компаниянинг вакциналарни ишлаб чиқариш бўйича махсус технологияси қисқа вақт ичида эришишга имкон беришини таъкидлади. Шунингдек, Шахин ўзининг компанияси ва АҚШнинг Pfizer консерни билан биргаликда ишлаб чиқарилган вакцинанинг Буюк Британияда тарқалган коронавирус мутациясига қарши самарали бўлишини тахмин қилди. «Тадқиқотлар ўтказилганидан кейин буни аниқ билиб оламиз (Pfizer'нинг янги штамм бўйича самарадорлиги — таҳ.) ва бу тахминан икки ҳафта давом этади. Aммо бизнинг вакцинамиз янги штаммга қарши самарадорлик эҳтимоли жуда юқори», — дея қўшимча қилди Шахин. — Интерфакс.
Япониянинг собиқ бош вазирига жиноий иш очилмайди
Токио прокуратурасининг махсус тергов гуруҳи мамлакатнинг собиқ бош вазири Синдзо Aбэ билан суҳбат ўтказди ва кўплаб матбуот хабарларига қарамай, уни сайловчиларга пора берганликда ва сиёсий маблағлар тўғрисидаги қонунни бузганликда айблаш учун асос йўқ деган хулосага келди. Шу билан бирга, соддалаштирилган процедура бўйича айблов 2012 йил декабридан 2020 йил сентябригача мамлакат ҳукуматини бошқарган 66 ёшли собиқ бош вазирнинг катта котибига чиқарилиши мумкин. Хусусан, Абэнинг бош котиби (собиқ) бош вазир тарафдорлари учун 2013 йилдан 2019 йилгача меҳмонхоналардан бирида зиёфатлар ўтказишда сиёсий маблағлар тўғрисидаги қонунни бузганликда айбланмоқда. Зиёфат қатнашчилари егулик учун пул тўлашар эди, аммо йиғилган маблағ етарли бўлмагани учун Абэнинг маблағларидан, тегишли ҳужжатларсиз, зиёфатга ажратилар эди. Маълумотларга кўра, 2015 йилдан бери камида 40 млн иена (387 минг доллардан ортиқ) миқдорида маблағ жамғармадан ноқонуний ишлатилган. Айблановчининг айби топилса, унга 5 йил қамоқ жазоси ёки 1 млн иена (9,7 минг доллар) жарима солинади. — Yomiuri.
Исроил ва AҚШ делегациясининг Марокашга ташрифи муносабатларни нормаллаштиришга қаратилган
Биньямин Нетаньяху Исроил ва Марокаш ўртасидаги муносабатларни нормаллаштириш жараёнини тезлаштиришда мамлакат ва АҚШ қўшма делегациясининг 22 декабрь куни Работга ташрифининг асосий вазифаси эканлигини таъкидлади. «Эртага бизнинг Миллий хавфсизлик кенгаши раҳбари Меир Бен-Шаббат билан биргаликда сиз, Жаред (Трампнинг катта маслаҳатчиси ва куёви Жаред Кушнер — таҳ.), Марокашга Исроил-АҚШ қўшма делегациясига раҳбарлик қиласиз. Бу Исроил ва Марокаш ўртасидаги муносабатларни нормаллаштиришни тезлаштирадиган жуда муҳим ташриф бўлади», — деди Исроил бош вазири. «Бугун сиз бу ерда (Қуддусда), эртага Бен-Шаббат билан биргаликда Марокаш Қироли Муҳаммад IV билан учрашасиз. Илтимос, унга мендан ва бутун Исроил халқидан унинг тарихий қарорида (Исроил билан муносабатларни нормаллаштириш — таҳ.) учун бизнинг самимий саломимизни ва қўллаб-қувватлашимизни етказинг», — деди Нетаньяху Кушнерга. Бундан аввал Исроил АҚШ ёрдами билан БАА, Баҳрайн ва Судан давлатлари билан алоқаларни яхшилади. — ТАСС.
