Саудия Арабистони ҳукумати коронавируснинг янги штамми тарқалиши сабабли барча халқаро парвозларни бир ҳафтага тўхтатиб қўйди, деб хабар бермоқда Saudi Press Agency қироллик ички ишлар вазирлиги вакилига асосланиб. Чекловлар яна бир ҳафтага узайтирилиши мумкин.

Шунингдек, чекловлар узайтирилиши эҳтимоли билан қиролликка қуруқлик ва денгиз портлари орқали кириш ҳам бир ҳафтага тўхтатиб қўйилди.

Европа ва янги коронавирус штамми пайдо бўлган мамлакатлардан қиролликка барча қайтиб келганлар икки ҳафтага ўз-ўзини яккалаб, COVID-19 га тест топширишлари керак.

Аввалроқ, Буюк Британияда 70% кўпроқ юқумли бўлган коронавируснинг янги штамми қайд этилгани ва кейинчалик у Голландия, Дания, Австралия ва Италияда ҳам аниқлангани ҳақида хабар берилган эди. Бир қатор Европа давлатлари Буюк Британия билан ҳаво қатновига чекловлар қўйди.