15−18 декабрь кунлари Тошкент шаҳрида ўтказиладиган «Ўзбекистоннинг маданий мероси — янги Ренессанс пойдевори» анъанавий маданий мерос ҳафталиги доирасида «Ўзбекистон кинематографияси: ўтмиш, бугун, келажак» номли ижодий кун ўтказилиши кўзда тутилган.
17 декабрь куни «Ўзбеккино» МА буюртмасига биноан суратга олинган, Ўзбекистон Оскар қўмитаси томонидан Оскар-2020 мукофотига номзод этиб кўрсатилган режиссёр Ёлқин Тўйчиевнинг «Фариданинг икки минг қўшиғи» бадиий фильми намойиш этилади. Фильм шунингдек, «Москва премьераси» халқаро фестивалида Гран-при мукофотини қўлга киритди. «Олтин глобус» совринининг «Энг яхши хорижий фильм» номинациясига даъвогарлар рўйхатидан жой олди.
Фильмда ўтган асрнинг бошларида Туркистонда юз берган сиёсий воқеаларнинг шу юрт аҳолисига кўрсатган таъсири бир оила мисолида очиб берилади. Фильм бош қаҳрамони Комил никоҳидаги уч аёл билан яшайди ва яна уйланади. Тўртинчи аёлнинг оилага кириб келиши билан персонажлар ҳаётида турли муаммолар ва сиёсий можаролар туфайли Комилнинг оиласи пароканда бўлиб кетади.
Сценарий муаллифи ва режиссёр: Ёлқин Тўйчиев.
Постановкачи оператор: Баҳодир Йўлдошев.
Постановкачи рассом: Бектош Ражабов.
Фильм директори: Шавкат Ризаев.
Ролларда: Баҳром Матчонов, Юлдуз Ражабова, Элмира Раҳимжонова, Маржона Ўлжаева, Санобар Ҳақназарова, Нодира Хожиқулиева ва бошқалар.
Бундан ташқари, 23 декабрь куни Республика Ёшлар ижод саройида «Ўзбеккино» МА буюртмасига биноан суратга олинган режиссёр Аюб Шаҳобиддиновнинг «Рангсиз тушлар» бадиий фильмининг ҳам катта премьераси бўлиб ўтиши режалаштирилган.
Элатиб ўтамиз, мазкур фильм жорий йилнинг 18−22 декабрь кунлари Италия Республикасининг Рим шаҳрида 18 мамлакатдан саралаб олинган фильмлар иштирокидаги «Asiatica Film Festival XXI» халқаро кинофестивали дастуридан ҳам ўрин олган.
«Рангсиз тушлар» филмида неча йиллик маҳкумликдан сўнг, озодликка чиққан аёл — Кашмиранинг жамиятга мослашишидаги қийинчиликлар ҳикоя қилинади. Шунингдек, ўткир ижтимоий муаммолар ва жамиятнинг айрим камчиликлари намойиш этилган.
Сценарий муаллифи: Умид Ҳамдамов
Оператор: Азизбек Арзиқулов
Рассом: Шамшод Иброҳимов,
Композитор: Убайдулло Каримов.
Ролларда: Феруза Саидова, Карим Мирҳодиев, Шоҳида Исмоилова, Бекзод Абдумухитов ва Асал Абдуллаевалар ижро қилишган.
