Президент Шавкат Мирзиёев раислигидаги видеоселектор йиғилишида қишга тайёргарликда йўл қўйилган камчиликларни ҳал этиш масалалари танқидий таҳлил қилинди.

«Газ тизими билан боғлиқ муаммолар бугун юзага келмагани, балки ўттиз йилдан бери бизни қийнаб келаётганидан барчамиз хабардормиз. Лекин буни баҳона қилишга ҳеч кимнинг ҳаққи йўқ», — деди Президент.

«Халқимизга газ керак, уларнинг кўпчилиги бунинг учун тўловларни ўз вақтида ҳалол қилиб, тўлаб келмоқда», — қўшимча қилди у.

Ҳозирда 1 мингдан зиёд маҳалла, жумладан Андижонда — 429 та маҳалла, Наманганда -180 та, Фарғонада — 142 та, Тошкент вилоятида — 73 та маҳаллада табиий газ босимлари пасайган.

Таҳлиллар шуни кўрсатмоқдаки, бугунги кунда газ таъминотида суткасига 20 миллион метр куб танқислик мавжуд.

«Шунинг учун, куни-кеча газ экспортини қисқартириш бўйича топшириқ бердим. Бунинг ҳисобига, кунига 7−8 миллион метр куб газ қўшимча равишда аҳоли эҳтиёжи учун йўналтирилади», — дея таъкидлади давлат раҳбари. — «Шундан кейин ҳам газ бўлмаса, хафа бўлманглар. Қонун олдида жавоб берасизлар», — президентнинг Алишер Султонов (энергетика вазири) ва Мехриддин Абдуллаевга («Ўзбекнефтгаз» раҳбари) қаратилган сўзларини келтирмоқда «Газета.uz» мухбири.

Аҳоли эҳтиёжини қоплаш учун яна 217 минг тонна суюлтирилган газ етказиб бериш вазифаси қўйилди. Самарасиз ишлаётган 25 та конни инвесторларга «риск-сервис контракт» шартлари асосида бериб, табиий газ ишлаб чиқаришни кўпайтириш мумкинлиги айтилди.