14 декабрь куни жиноят ишлари бўйича Фарғона вилоят судида Сўх воқеалари юзасидан суд жараёнида судланувчилар Б.Шодиев, Ё.Жўраев, Ш. Махмадалиев, З.Зайлобов ҳамда Ш. Олимовлар сўроқ қилинди. Бу ҳақда Kun.uz мухбири хабар берди.
Суд бошида адвокат Бурхонжон Мамажонов суд раисига 13 нафар шахснинг хулқ-атворидан келиб чиқиб уларга тайинланган уй қамоғи эҳтиёт чорасини бекор қилиш таклифини киритди. Адвокат таклифи қаноатлантиришдан рад этилди.
Кейин судланувчиларнинг кўрсатмалари тингланди.
Б.Шодиев Чашмадаги жанжалда қатнашмаганлигини, 31 май куни Чашмада яшайдиган опасининг уйига борганлигини таъкидлади.
«2018 йилда давлатдан кредит олиб, қорамоллар олган эдим. Ўша йили қирғизлар Қайроқ қишлоғида молларимизни ҳайдаб олиб кетишган эди. Ўшанда қирғизлар билан уришган эдик. Чашма қишлоғида бўлган урушда иштирок этмаган бўлсам, нега бу ердаман? Ҳалигача тушуна олмаяпман. Тушунишимча, ўша Қайроқдаги жанжалда ҳақимизни талаб қилиб қирғизлар билан уришганимдан кейин мени ҳам Чашма воқеасида алоқаси бор деб ўйлаган бўлсалар керак.
Б.Шодиев тергов давомида уни қийноққа солишганини таъкидлаган. «Тергов пайтида бошимга қоп кийгизилган эди. Белдан пастки қисмимга шундай урдиларки, натижада бир ҳафта юра олмай қолдим. Тергов жараёнида ҳеч ким билан юзлаштирилмадим», — деди Б.Шодиев.
Судланувчи Ё.Жўраев ҳам Чашмадаги жанжалда иштирок этмаганини, шу вақтда онасини кўриш учун касалхонада бўлганини таъкидлади.
«Касалхонага борсам тез ёрдам машиналарида яраланганлар олиб келинаётган экан. У ерда одам жуда кўп эди. ИИБ ходимлари тўпланганларни тарқатишга уринишарди. Касалхонада эрталаб соат 7 дан 7:30 ларгача бўлдим. Онам билан гаплашдим. Амакимнинг ўғли Савриддин Жўраевни ИИБ ходимлари уриб жағини синдиришган экан. Касалхонада амакиваччамни ҳам кўриб қолдим. Менга нисбатан касалхонадаги оммавий тартибсизликларда қатнашганликда айблов илгари суришяпти. Лекин мен унда иштирок этмаганман», — деди Ё.Жўраев.
Ш. Махмадалиев уни ИИБ биносига тош отганликда айблашаётганлигини, ИИБда отаси ишлагани ва отаси ишлаган жойга тош отмаслигини таъкидлаган. У ҳам тергов давомида қийноққа солинганини таъкидлаган.
«Уйимдан соат 11 ларда ИИБ бўлимига олиб кетишди. Ўша куни 23 ларгача ИИБ биносида ўтирдим. Тергов хонасида мени уришди», — деди Ш. Махмадалиев ўз кўрсатмасида.
Судланувчи З.Зайлобов ҳам жанжалда қатнашмаганлигини, прокуратурада ниқоб таққан шахслар унинг оёғига урганини маълум қилган.
Унинг сўзларига кўра, 31 май куни телефонига пул қўйиш учун марказга бориб, уйига қайтган.
«Орадан бир қанча вақт ўтиб, телефон сотиб олиш мақсадида марказга бордим. ИИБ ходимлари эрталаб соат 8 ларда марказдан ушлаб кетишди. ИИБ биносида соат 17 гача ушлаб туришди. 17 дан кейин прокуратурага олиб кетишди. Фуқаро кийимидаги шахс у ерда менга „Лавҳага тушиб қолгансан“, деди. Шундан сўнг ниқоб таққан шахслар оёғимга уришди. Умримда биринчи маротаба ИИБ ходимларидан калтак ейишим. Бу калтаклар зарбидан шокка тушиб қолдим. Улар уришаётганида „Нега айбсиз одамни уряпсизлар“, десам „Сен ИИБ биносига тош отгансан“, деб яна уришди», — деди З.Зайлобов.
У тергов пайтида 3 нафар шахснинг исм-фамилиясини унга ўқиб, уларни танийман деб қўл қўйиб берсагина, уйига қўйиб юборишларини, акс ҳолда уйига кетмаслигини айтишганини таъкидлади. «Мен қандай мазмундаги айбловга қўл қўяётганимни билмаганман. Қўрққанимдан қўл қўйиб берганман. Тергов жараёнини видеога олишмади. Прокуратурадан кеч соат 2:30 ларда уйга қайтдим», — деган З.Зайлобов ўз кўрсатмасида.
Охирги бўлиб кўрсатма берган судланувчи Ш. Олимов тартибсизликларда қатнашганлигини таъкидлади.
«Чашмага етиб борсак, у ерда тумонат одам йиғилган экан. Тепаликка чиқаётганимда қонга беланган одамни олиб келишаётган экан. Яраланган одамни кўриб қўрқиб кетдим. Ўзимга кела олмадим анча вақт. Шу сабаб тошбўрон бўлаётган томонга бормадим. Бироздан кейин қирғизларнинг биз томонга тинмай тош отишаётганини кўрдим. Мен ҳам уларга тош отдим. 2 соат атрофида жанжални томоша қилдик. Кейин „Вилоят ҳокими Шуҳрат Ғаниев келди“, деган гап эшитдим. Ҳоким оқ кепкада экан. Уни 50−100 метрлар чамаси узоқликдан кўрдим. Қирғизлар отган тошлардан бири лабимга келиб урилди. Тош зарбидан ерга йиқилдим. Зудлик билан мени тез тиббий бўлимига олиб боришиб лабимни тикишди. Иккита чок тушди».
Ш. Олимов ҳам тергов жараёнида калтакланганини, қўл қўйиши учун қўрқитишганлигини айтиб ўтган.
«ИИБ ходимлари 12 сентябрь куни уйга келишган экан. Мен ўша куни кўчада эдим. Эрталаб соат 7 ларда ИИБга бордим. ИИБ биносида „31 май куни қаерда эдинг“, деб юзимга уришди. „Нега Чашмага боргансан“, дея яна урдилар. Шу орада мени ураётган шахснинг шериги „кўкарадиган жойига урма“, деди. Бу орада „Вилоят ҳокимига тош отгансан“, деб яна уришди. Икки киши навбат билан калтаклашди. Айблов варақасини кўрсатишиб, шуни кўчириб берсанг, уйга кетасан дейишди. Калтак зарбидан шокка тушиб қолгандим. „Қўл қўймасанг, подвалга тушасан“, деб қўрқитишди», — деди Ш. Олимов.
Kun.uz мухбирининг таъкидлашича, Ш.Олимов кўрсатмалари сўнгида прокурорнинг «Ҳарбийнинг қалқонига ҳақиқатан ҳам тепганмисиз?» деган саволига аниқ жавоб бера олмаган.
Судланувчиларнинг кўрсатмалари тинглангач, суд ишида 18 декабрб кунига қадар танаффус эълон қилди.
