Лондон, Эссекс ва Хартфордширнинг айрим қисмлари коронавируснинг «янги варианти» аниқланганлиги сабабли, 16 декабрдан бошлаб карантиннинг максимал даражасига (учинчи даражали) ўтказилади, дея хабар берди BBC News.
Буюк Британия соғлиқни сақлаш вазири Мэтт Хэнкокнинг айтишича, бу Англиянинг жанубида касалликнинг тезроқ тарқалиши эҳтимоли мавжудлиги билан боғлиқ.
Учинчи даражадаги карантин чекловларига кўра, барлар, паблар, кафелар ва ресторанлар фақат етказиб бериш режимида ишлайди. Театрлар ва кинотеатрлар каби кўнгилочар муассасалар ҳам ёпилиб, мухлисларнинг стадион тадбирларига ташриф буюриши тақиқланади. Ёпиқ йиғилишлар ҳам тақиқланади. Олти кишидан кўп бўлмаган гуруҳларга очиқ жойларда йиғилишга рухсат берилади.
Аввалроқ бир қатор Европа мамлакатларида, шу жумладан, Германия, Туркия, Украина каби давлатларда чекловлар ўрнатилаётгани ҳақида хабар берган эдик.
