12 декабрь куни Россия Федерациясининг вақтинчалик ишончли вакили Александр Комаров Давлат Думаси депутати Вячеслав Никоновнинг «Қозоғистон ҳудуди Россиянинг катта совғаси» деган сўзлари сабабли Қозоғистон ТИВга чақирилди.
Россиялик дипломат Қозоғистон ТИВ позицияси билан нота олди, дейилади вазирлик баёнотида. Вазирликнинг таъкидлашича, «айрим россиялик сиёсатчиларнинг Қозоғистонга нисбатан ошиб борётган провокацион ҳужумлари иттифоқчилик муносабатларига жиддий зарар етказмоқда».
Вячеслав Никонов 10 декабрь куни «Первый канал»да «Катта ўйин» дастури эфирида ушбу сўзларни айтган эди.
«Қозоғистон шунчаки мавжуд бўлмаган. Шимолий Қозоғистонда умуман аҳоли йўқ эди. Улар фақат жанубда бўлган. Аслида, Қозоғистон ҳудуди Россия ва Совет Иттифоқининг совғасидир «, — деди россиялик депутат.
Кейинчалик, РИА Новости хабарига кўра, Вячеслав Никонов Қозоғистон ҳудуди ҳақидаги сўзлари Қозоғистон ССР чегараларини белгилашда мамлакат манфаатлари тўлиқ ҳурмат қилинганлигини англатишини тушунтирди.
