Россияга Тошкент вилояти Зангиота туманидаги Tashkent Pharma Park илмий-ишлаб чиқариш фармацевтика кластери ҳудудида COVID-19 га қарши вакциналар ишлаб чиқариш таклиф қилинди. Ушбу таклифни Россия томонига 4 декабрь куни давра суҳбатида Фармацевтика саноатини ривожлантириш агентлиги директори Сардор Кариев киритди.
43,75 гектар майдонда Tashkent Pharma Park қурилиши январь ойи охирида бошланган эди. Кластер таркибига фармацевтика техника университети, шунингдек, ўзининг инфратузилмаси бўлган саноат зонаси киради. Бу ерда 2020−2024 йилларда 191 млн долларлик лойиҳаларни амалга ошириш режалаштирилган.
Лойиҳа қиймати 53 миллион долларни, ишлаб чиқариш қуввати 120 миллион донани ташкил қилади. Агентлик раҳбари тақдимотида таъкидланганидек, Ўзбекистонда эмлаш кун тартибига киритилган ва COVID-19 га қарши вакциналар ишлаб чиқариш бўйича вазифалар белгилаб олинган. Гап вакциналарнинг ҳар хил турларини ишлаб чиқариш учун майдонча ва замонавий синов лабораториясини яратиш тўғрисидаги президент фармони ҳақида кетмоқда.
Қайд этилишича, ҳозирги вақтда иммунобиологик вакциналар импортининг улуши 92 фоизни ташкил этади.
Эслатиб ўтамиз, 4 декабрь куни Ўзбекистонга Россиянинг коронавирусга қарши «Спутник V» вакцинаси олиб келинган эди. Препарат намуналари Ўзбекистон ҳудудида вакцинани рўйхатдан ўтказиш ва саноат ишлаб чиқаришни йўлга қўйиш учун зарур бўлган синовлар учун етказилди.
