Россия Федерацияси саноат ва савдо вазири Денис Мантуров Тошкентга коронавирусга қарши «Спутник V» вакцинаси намуналарини шахсан етказиб берди. Бу ҳақда Россия саноат ва савдо вазирлиги матбуот хизмати хабар бермоқда.
Намуналар Ўзбекистон ҳудудида вакцинани рўйхатдан ўтказиш ва саноат ишлаб чиқаришни йўлга қўйиш учун зарур бўлган синовлар учун Ўзбекистонга етказилди.
Ўзбекистон санитария-эпидемиология таъминоти хизмати вакили Россия вакцинасини синовларини бошлаш вақтлари тўғрисидаги саволга жавоб берар экан, бугунги кунда ушбу масала муҳокама қилинаётгани, ҳукумат қарори кутилаётганини айтди.
Маълумотларга кўра, вакцинанинг дастлабки 100 дозаси кеча самолётда етказилган. «Олиб келишгунга қадар, -20 даража ҳароратда музлатгичга қўйилган эди», дейилади манбада.
Россия тўғридан тўғри инвестициялар жамғармаси (РТИЖ) ва Laxisam фармацевтика компанияси Ўзбекистонга 35 миллион доза коронавирусга қарши «Спутник V» вакцинасини юборишга келишувга эришган эди.
Ўткизилган тадқиқотлардан олинган натижаларнинг иккинчи оралиқ таҳлиллари биринчи инъекциядан 28 кун ўтиб Россияда ишлаб чиқарилган COVID-19 га қарши «Sputnik V» вакцинаси самарадорлиги 91,4 фоиз, биринчи инъекциядан 42 кун ўтиб эса 95 фоиздан ошганлиги маълум қилинган.
