Маблағларнинг ноқонуний сарфланишининг олдини олиш бўйича Қашқадарё вилоятида ўтказилган йиғилишда 2018, 2019 ва 2020 йилнинг шу даврига нисбатан ичимлик суви учун ажратилган 23 млрд сўм маблағ самарасиз сарфлангани маълум қилинди, дея хабар берди NasafNews нашри.

Ҳисоб палатаси раисининг ўринбосари Саидлазиз Саидкаримовнинг айтишича, бунинг оқибатида 10 та ҳудудга ҳалигача ичимлик суви етиб бормаган.

Аниқланишича, энг кўп 7,2 млрд сўм маблағ Шаҳрисабз туманидаги ВУ-2 ишлаб чиқариш иншоотини бино ва иншоотларини реконструкция қилиш объекти учун ажратилган. Шунингдек, вилоятнинг Нишон, Касби, Косон, Муборак туманларига ҳам ажратилган маблағлардан унумли фойдаланилмаган. Шу сабаб ушбу ҳудудларда аҳолини ичимлик суви билан таъминлаш бўйича муаммолар очиқлигича қолмоқда.

Эслатиб ўтамиз, президент Қашқадарёга ташрифи давомида вилоят аҳолисини ичимлик суви билан таъминлаш масаласини ҳам танқид қилган эди.

Давлат раҳбари бу борадаги муаммоларга тўхталиб, Ғузор тумани аҳолиси атиги 2 фоиз ичимлик суви билан таъминланганини айтганди.

«Аҳолининг ичимлик суви таъминоти вилоят бўйича 50 фоизни, хусусан, Косонда 26, Деҳқонободда эса атиги 4 фоизни ташкил қилади. Қувурларнинг 60 фоизи таъмирталаб бўлиб қолган. Қарши шаҳрининг канализация тизими ҳам эскирган» — дея масъулларга юзланган эди президент Шавкат Мирзиёев.