Ўткизилган тадқиқотлардан олинган натижаларнинг иккинчи оралиқ таҳлиллари биринчи инъекциядан 28 кун ўтиб Россияда ишлаб чиқарилган COVID-19 га қарши «Sputnik V» вакцинаси самарадорлиги 91,4 фоиз, биринчи инъекциядан 42 кун ўтиб эса 95 фоиздан ошишини кўрсатмоқда. Бу ҳақда вакцина ишлаб чиқарувчилари пресс-релизида айтилмоқда.
Эмланган 14 минг иштирокчидан 8 киши COVID-19 юқтирган. Плацебо қабул қилган 4699 киши орасида ушбу касалликнинг 31 та ҳолати қайд этилган.
Ишлаб чиқувчилар халқаро бозорлар учун битта вакцина дозаси нархини 10 доллардан пастроққа баҳолашди. Россия фуқаролари учун эмлаш бепул бўлади.
Аввалроқ Соғлиқни сақлаш вазирлиги томонидан Россиянинг «Sputnik V» вакцинасини ҳам Ўзбекистонга келтириш бўйича ишлар йўлга қўйилганлиги ҳақида хабар берган эдик.
