Илон Маск дунёдаги энг бой одамлар рейтингида иккинчи ўринни эгаллади
SpaceX ва Tesla раҳбари Илон Маск Microsoft асосчиси Билл Гейтсни ортда қолдириб, дунёдаги энг бой одамлар рейтингининг иккинчи қаторига кўтарилди. Tesla асосчисининг бойлиги йил давомида 100,3 млрд долларга кўпайиб, 127,9 млрд долларни ташкил қилмоқда. Гейтснинг бойлиги эса 127,7 млрд долларга баҳоланмоқда. Рейтингда биринчи ўринда Amazon асосчиси Жефф Безос қолмоқда, унинг бойлиги 182 млрд долларни ташкил этади. — Bloomberg Billionaires Index.
Apple хавфсизлик хизмати раҳбари коррупцияда айбланмоқда
Apple хавфсизлик хизмати раҳбари Томас Мойер бир нечта компаниянинг ишчилари учун қуролни яширишга рухсат олиш эвазига полицияга пора беришга уринганликда айбланмоқда. Маълумотларга кўра, Мойер Санта-Клара полиция бошлиғига 70 минг долларлик 200 дона iPad таклиф қилган. Суд 2021 йил январь ойида бўлиб ўтади, Мойер қамоқ жазосига ҳукм қилиниши мумкин. — Санта-Клара (Калифорния) округи прокуратураси.
Исроил бош вазири илк бор Баҳрайнга ташриф буюради
Исроил бош вазири Биньямин Нетаньяху Баҳрайннинг валиаҳд шаҳзодаси Салмон бин Ҳамад бин Исо ал-Халифа билан телефон орқали суҳбатлашганини ва ушбу араб давлатига «яқин келажакда» биринчи расмий ташрифини амалга ошириш учун таклифини қабул қилганини айтди. «Мен Баҳрайннинг валиаҳд шаҳзодаси билан телефонда гаплашдим. У мени яқин орада Баҳрайнга расмий шаклда ташриф буюришга таклиф қилди ҳамда мен буни Исроил номидан ва байроғи остида қиламан», — дея эълон қилди бош вазир. — Биньямин Нетаньяху Twitter саҳифаси.
Биткоин курси сўнгги уч йилда биринчи марта 19 минг доллардан ошди
Фото: CoinDesk
Биткоин курси ўсишни давом этиб, сўнгги уч йилда биринчи марта 19 минг доллардан ошди. Ҳозирда крипто валюта нархи 19385 долларни ташкил қилмоқда. 2017 йил декабрь ойида биткоин нархининг энг юқори кўрстакичи қайд этилган (19783 доллар). — CoinDesk.
«Sputnik V» вакцинасининг самарадорлиги 95 фоиздан ошди
Ўткизилган тадқиқотлардан олинган натижаларнинг иккинчи оралиқ таҳлиллари биринчи инъекциядан 28 кун ўтиб Россияда ишлаб чиқарилган COVID-19 га қарши «Sputnik V» вакцинаси самарадорлиги 91,4 фоиз, биринчи инъекциядан 42 кун ўтиб эса 95 фоиздан ошишини кўрсатмоқда. Ишлаб чиқувчилар халқаро бозорлар учун битта вакцина дозаси нархини 10 доллардан пастроққа баҳолашди. Россия фуқаролари учун эмлаш бепул бўлади. — Газета.uz
Коронавирус туфайли Хитойда юзлаб рейслар бекор қилинди
Сешанба куни Хитойнинг Шанхай ва Тянцзин шаҳарларидаги аэропортларда коронавирус ҳолатлари аниқлангани сабабли бир неча юз рейс бекор қилинди. Шанхайнинг «Пудонг» халқаро аэропортида камида 436 рейс бекор қилинган, шунингдек, Тянцзин «Биньхай» аэропортида 165 та рейс тўхтатилган. Сўнгги кунларда ушбу икки шаҳарда бир нечта COVID-19 ҳолатлари аниқланган эди. — Газета.uz
Трамп ҳокимиятни Байденга ўтказишга кўрсатма берди
Демократлар партияси номзоди Жо Байден 2020 йилги АҚШ президентлик сайловларида ғалаба қозонган эди. Бўлиб ўтган сайловда мағлубиятини тан олишдан бош тортаётган АҚШнинг амалдаги президенти Дональд Трамп мамлакатда ҳокимиятни янги маъмуриятга ўтказиш учун расмий жараённи бошлашни буюрди. Федерал умумий хизматлар агентлиги (GSA) раҳбари Мёрфи томонидан сайловлардан деярли уч ҳафта ўтгач Жо Байден штабига юборилган қисқа хат, АҚШ маъмурияти унинг ғалабасини тан олишга тайёр эканлигининг биринчи далили сифатида қаралди. — Газета.uz
