Беларусь хавфсизлик хизмати мамлакатнинг энг машҳур Telegram канали асосчиси ва унинг собиқ бош муҳарририни кузатиб бориладиган террорчилар рўйхатига киритди, дея хабар берди Bloomberg.
Nexta ва Nexta Live каналларининг асосчиси 22 ёшли Степан Путило ва 25 ёшли Роман Протасевич Беларусь фуқаролари бўлиб, давлат хавфсизлик қўмитаси томонидан тузилган 700 дан ортиқ «террористик фаолиятга алоқадор шахслар» рўйхатига киритилди. 726 шахсдан иборат бўлган ушбу руйхат 19 ноябрь куни КГБ (Давлат хавфсизлик қўмитаси) сайтида янгиланди.
Протасевич сентябрь ойида канални тарк этган эди. Рўйхатга киритиш учун асос сифатида Путило ва Протасевичнинг Беларусь Жиноят кодексининг оммавий тартибсизликларни ташкил этиш моддасини бузиш ҳолатлари кўрсатилган. Шунингдек, бундан аввал Путило ва Протасевичга нисбатан Жиноят кодексининг жамоат тартибини қўпол равишда бузган гуруҳ ҳаракатларини ташкил этиш ва «касбий мансублиги асосида ижтимоий адоватни қўзғатишга қаратилган қасддан қилинган ҳаракатлар» мазмунидаги моддалар бўйича айбловлар илгари сурилган эди.
Nexta Live канали август ойида мамлакат бўйлаб полициячиларнинг намойишчиларга қарши шафқатсизларча қаршилик кўрсатганини ва биргина пойтахтнинг ўзида 100 мингдан ортиқ фуқаро мунтазам равишда қатнашган намойишларни ёритиб боришда асосий рол ўйнади. Ҳозирда ушбу каналларнинг обуначилари мос равишда 845 минг ва 1,7 млнга тенг. Ушбу каналлар Беларусдаги сайловлар ва норозилик намойишлари бошланганидан кўп ўтмай машҳурликка эришди. Бир кун ичида Nexta Telegram каналининг обуначилари 400 минг кишига кўпайган.
Белта давлат ахборот агентлиги хабарига кўра, канал октябрь ойида «экстремистик» деб топилган ва Беларусда каналдаги материалларни тарқатиш ёки логотипини намойиш қилиш тақиқлаб қўйилган. Белтанинг хабар қилишича, шу ҳафта Беларусь ҳукумати Польшадан Путило ва Протасевични топширишларини талаб қилган.
Эслатиб ўтамиз, 15 ноябрь куни Минскда бўлиб ўтган митингда 1100 дан ортиқ киши ҳибсга олинган эди.
