19 ноябрь куни SamAuto компанияси 51-йўналиш (Юнусобод 6 квартал — Бешёғоч майдони) бўйича ҳаракатланадиган синов электробусини «Тошшаҳартрансхизмат» АЖга тақдим этди, дея хабар берди автозавод вакиллари «Газета.uz»га.
Эксплуатация жараёнида SamAuto мутахассислари ўз электробусини ишлаб чиқишда йўловчилар ва ҳайдовчиларнинг фикрларини ҳисобга олишади, шунингдек мазкур моделнинг сифати ва функционал вазифалари ўрганилади ва уларнинг мониторинги олиб борилади.
«Ушбу электробус электротранспорт ишлаб чиқариш бўйича жаҳон етакчиларидан бири BYD компанияси томонидан ишлаб чиқарилган. Бир марталик қувватлантириш ҳисобига 300 км масофани босиб ўтади, бу шаҳар автобусининг ўртача бир кунлик масофа босишига мос келади. Тўлиқ қувватлантиришни электр тармоғига юклама камроқ бўлган пайтда 3−4 соат ичида бажариш мумкин. Электробуслар хизмат кўрсатиш жиҳатидан содда, шовқинсиз ҳамда газ ва дизель транспортига қараганда кам харажат талаб қилади», — деди SamAuto бош директори ўринбосари, маркетинг ва сотувлар бўлими раҳбари Илҳом Ярашев.
Электробуснинг узунлиги 12 метрни, йўловчиларни ташиш ҳажми — 76 кишини ташкил қилади. «Унинг пол қисми паст бўлади: зинапоялар ва подиумнинг йўқлиги туфайли йўловчилар, шу жумладан пенсионерлар, аравачаларда ҳаракатланувчи йўловчилар, алоҳида эҳтиёжли кишилар салон бўйича эркин ҳаракатлана оладилар. Шунингдек, электробус видеокузатув камераси ва автоматик ҳаво намлигини сақлаш ва иситиш тизими билан жиҳозланган», — дейилади компания хабарида.
2030 йилгача Атроф-муҳитни муҳофаза қилиш Концепциясига мувофиқ, Ўзбекистон ижтимоий транспортининг камида 50 фоизи зарарли моддаларни ҳавога чиқаришни камайтириш учун муқобил ёқилғи турларига ўтиши керак.
