Бирлашган Миллатлар Ташкилотининг Лойиҳа хизматлари бўйича бошқармаси (ЮНОПС) ҳузурида Санитария ва гигиена жамғармаси ташкил этилди, деб хабар берди БМТнинг Янгиликлар маркази.
Келгуси беш йил ичида жамғарма одамларни сув, ҳожатхона ва қизлар гигиенаси воситалари билан таъминлаш лойиҳаларини молиялаштириш учун 2 млрд доллар олиши кутилмоқда.
Бирлашган Миллатлар Ташкилоти Бош котибининг ўринбосари Амина Муҳаммад янги молиявий механизмни ишга тушириш маросимида сўзлар экан, аҳоли саломатлиги ва унинг турмуш даражаси тўғридан-тўғри санитария ҳолатига боғлиқлигини таъкидлади. Унинг қўшимча қилишича, COVID-19 пандемияси пайтида юқумли касалликлар тарқалишининг олдини олишда гигиена катта аҳамиятга эга бўлди. Шу билан бирга, пандемия одамларнинг санитария хизматларидан фойдаланишидаги катта номутаносибликни келтириб чиқарди.
Ҳисоботда таъкидланишича, дунё аҳолисининг деярли ярми ҳали ҳам етарли санитария шароитидан фойдалана олмаяпти. Бундан ташқари, 892 миллион киши ҳали ҳам очиқ ҳавода ҳожат чиқариши керак, 620 миллион бола ҳожатхонаси бўлмаган мактабларда ўқийди. Дунёдаги ҳар бешинчи касалхонада ҳожатхона ва сув йўқ.
«Агар сизнинг уйингизда ҳожатхона бўлмаса, қандай қилиб пандемия пайтида изоляция ва гигиенани таъминлай оласиз? Айниқса, бу қизлар ва аёллар учун қийин» , — деди ЮНИСEФ раҳбари Генриетта Фор. Унинг сўзларига кўра, уйда, мактабларда ва шифохоналарда санитария-гигиена воситаларидан фойдаланиш ҳашамат эмас, балки заруратдир. Унинг айтишича, ушбу имконият бутун дунёга улкан дивидендларни келтиради.
Санитария шароитидан фойдаланишнинг етишмаслиги нафақат инсон саломатлиги, қадр-қиммати ва хавфсизлиги учун хавфли оқибатларга олиб келади, балки катта иқтисодий йўқотишларни ҳам келтириши мумкин. Зарар йилига 222 миллиард долларни ташкил этади. Бу асосан маҳсулдорликнинг йўқотилиши ва соғлиқни сақлаш харажатларини ўз ичига олади.
