Ўзбекистоннинг бир неча ҳудудларида аҳоли синов тариқасида рўйхатга олинади. Бу ҳақда тегишли ҳукумат қарори қабул қилинди.
Ушбу қарор билан Ўзбекистонда 2023 йилда аҳолини рўйхатга олишга тайёргарлик кўриш ва уни ўтказиш тартиби тўғрисидаги низом тасдиқланди.
Қарорга кўра, 2021 йил 1−25 ноябрда Андижон вилояти Хўжаобод тумани, Тошкент вилояти Юқори Чирчиқ тумани, Хива шаҳри ҳамда Тошкент шаҳри Яшнобод туманларида аҳоли синов тариқасида рўйхатга олинади.
Бутун аҳолини рўйхатга олиш эса 2023 йил 1−25 ноябрда қуйидагича амалга оширилади:
- 1−5 ноябрда аҳоли интернет тармоғи орқали рўйхатга олинади;
- 6−10 ноябрда интернет орқали рўйхатга олинган респондентлар ва уларнинг уй манзиллари рўйхати шакллантирилади;
- 11−22 ноябрда аҳолини рўйхатга олиш варағи шакллари асосида уйма-уй юриб аҳоли рўйхатга олинади;
- 23−25 ноябрда ҳар бир участкадаги уй-жой манзилларининг 10 фоизи танланма равишда назорат кузатуви асосида ўрганилади.
Қарор билан аҳолини рўйхатга олиш жараёнларига жалб этиладиган шахсларга ҳақ тўлаш тартиби ва миқдорлари тасдиқланди.
Эслатиб ўтамиз, бундан аввал Ўзбекистон аҳолисини рўйхатга олиш муддати 2022 йилдан 2023 йилга қолдирилганлиги ҳақида хабар берган эдик.
