Жонс Хопкинс университети (АҚШ) маълумотларига кўра, Италия COVID-19 билан касалланганлар беморлари сони 1 миллиондан ошган ўнинчи, Европа бўйича эса бешинчи мамлакатга айланди. Шунингдек, бу кўрсаткичга Мексика (986 минг) ва Перу (925 минг) мамлакатлари яқин турибди.
Италияда сўнгги икки кун ичида коронавирус билан касалланиш даражаси кескин ошиб кетиши оқибатида инфекция юқтириш ҳолатлари 1 млн 28 мингга етди. Францияда (1,9 млн) эса вазият ёмонлашуви сабаб беморлар сони бўйича Россияни (1,8 млн) ортда қолдирди. Европа бўйича кейинги энг ёмон кўрсаткичлар Испания (1,4 млн) ва Буюк Британия (1,2 млн) мамлакатларига тегишли.
Энг ёмон вазият ҳамон АҚШда бўлиб турибди. Аввалроқ АҚШда COVID-19 билан касалланганлар сони 10 млн дан ошгани ҳақида хабар берган эдик.
Ўнталикка, шунингдек, Ҳиндистон (8,68 млн), Бразилия (5,74 млн), Аргентина (1,27 млн), Колумбия (1,16 млн) мамлакатлари ҳам кирган.
Ҳозирда дунё бўйлаб 52 млн дан ортиқ инсон COVID-19 инфекциясини юқтирган. Шулардан деярли 34 млн нафари тўлиқ тузалган ва 1,28 млн бемор вафот этган.
