Коррупцияга қарши курашиш агентлиги директори Акмал Бурхонов Бош прокуратурада бўлиб ўтган коррупцияга қарши курашиш бўйича идоралараро йиғилишда Марказий банк билан «комплаенс назорат» тизими масаласи бўйича бир қанча қийинчиликлар юзага келганини таъкидлади.
«Газета.uz» мухбири маълум қилишича, агентлик директори июль ойида президент раислигида яширин иқтисодиёт ва коррупцияга қарши курашиш бўйича йиғилишда вазирлик ва идораларда ҳамда давлат улуши бўлган 10 та банкда «комплаенс назорат» тизимини жорий этиш бўйича аниқ топшириқ берилганини таъкидлади.
Шу билан бирга, Бурхонов президент администрацияси ва бош прокуратура билан 26 вазирликда оператив равишда йўл хариталари ишлаб чиқилгани, бунга хорижий ҳамкорлар ва халқаро консалтинг ташкилотлари жалб этилганини маълум қилди.
Лекин Марказий банк нимагадур бу масалага жиддий ёндошмаган. Ҳисоб палатаси орқали ҳамда агентлик томонидан икки маротаба хат чиқарилган. Марказий банк номига хат чиққанидан кейин хоҳлаб-хоҳламай, тижорат банклари расмиятчилик учун «комплаенс назорат» тизимини жорий этиш бўйича йўл хариталарини юзаки қабул қилишди, дея агентлик директори сўзларини келтирмоқда «Газета.uz» мухбири.
«Биз яна ҳам ёрдам берайлик, „комплаенс назорат“ тизимини жорий этиш бўйича ўқитиб берамиз, деган хат чиқарсак, бу тижорат банклари Марказий банк раҳбарияти орқали вақт йўқ дейишди. Биз шуни тушуна олмаяпмиз. Ўзи банкни раҳбариятида коррупцияни олдини олиш бўйича иштиёқ, хоҳиш борми? Нима ҳалақит бераяпти?», — деди Акмал Бурхонов.
Марказий банк раиси ўринбосари Саидқаххор Холхўжаев агентлик директори саволига жавобан 2020−2021 йилларда коррупцияга қарши курашиш ва уни олдини олиш бўйича «йўл харитаси» Марказий банк тизимида тасдиқланганини маълум қилди.
Марказий банк раиси ўринбосари Саидқаххор Холхўжаев. Фото: Абдулло Ёдгоров / «Газета.uz»
«Тижорат банкларига ўзларининг акциядорлари ва кузатувчилар кенгаши бошлиқлари билан келишилган ҳолда тасдиқлаб, буни Ҳисоб палатаси ва агентикка бериш бўйича кўрсатмалар берилди. Бугунги кун ҳолатига ушбу давлат иштирокидаги 10 та тижорат банклари томонидан «йўл хариталари» тасдиқланиб, агентлик ва Ҳисоб палатасига тақдим этилди. Биздаги маълумотга асосан. Марказий банкда 1 ноябрь ҳолатига алоҳида «комплаенс назорат» тизими жорий этилди ва тасдиқланган «йўл харита"сидаги ҳар бир чора-тадбирлар бўйича тизимли ишларни давом эттириб кетаяпмиз», — деди Саидқаххор Холхўжаев.
