Жўрабек Мирзамаҳмудов Энергетика вазирининг биринчи ўринбосари лавозимидан озод этилди. Тегишли президент қарори 3 ноябрда имзоланган.
Президентнинг 3 ноябрдаги бошқа қарори билан Энергетика вазирининг биринчи ўринбосари ва «Ўзатом» агентлиги директори лавозимлари ажратилган.
Жўрабек Мирзамаҳмудов 2018 йил июнидан «Ўзатом» агентлигини бошқариб келаётган эди. 2019 йилнинг февраль ойида «Ўзатом» раҳбари сифатида энергетика вазирининг биринчи ўринбосари лавозимига тайинланган эди. У «Ўзатом» агентлиги раҳбари лавозимини сақлаб қолди.
2020 йилнинг январь ойидан Мирзамаҳмудов «Ўзкимёсаноат» компаниясининг бошқаруви раиси вазифасини бажарувчи бўлиб фаолият олиб бораётган эди. Энди у ушбу лавозимга в.б. қўшимчасисиз тасдиқланган.
Жўрабек Мирзамаҳмудов (1979 й. т.) 2001 йилда «Умид» жамғармаси гранти асосида АҚШдаги Алабама университетини, 2005 йилда эса Тошкент кимё технологиялари институтини тамомлади.
Аввал Вазирлар Маҳкамаси Ёқилғи-энергетика комплексини ривожлантириш ахборот-таҳлил департаменти мудири бўлиб ишлаган. «Ўзкимёсаноат» бошқаруви раисини ўринбосари ва иқтисодиёт вазири ўринбосари лавозимларида фаолият кўрсатган. 2018 йил июнидан «Ўзатом» агентлигини бошқариб келмоқда.
