Санитария-эпидемиологик осойишталик ва жамоат саломатлиги хизмати Бухоро вилояти бошқармаси бошлиғи Ашур Тўхтаев ўғлининг тўйида 53 киши қатнашгани учун 4 460 000 сўм миқдорида жаримага тортилди. Бу ҳақда «Дарё» вилоят Давлат санитария-эпидемиология назорати бошқармасига таяниб хабар қилди.
Бухоро вилоят Давлат санитария-эпидемиология назорати бошқармаси бошлиғи ўринбосари Ўктам Сафоевнинг маълум қилишича, Ашур Тўхтаев 25 октябрь куни вилоят марказидаги «Ипак йўли» ресторанида карантин талабларига риоя қилмай, 53 нафар фуқарони йиғиб, ўғлининг тўй маросимини ўтказган. Тўйга келган мазкур 53 нафар кишининг иккала қуда томон оила аъзолари, хонандалар ва тўй хизматчиларидан иборатлиги аниқланган.
Ашур Тўхтаевга нисбатан маъмурий иш материаллари тўпланган. Ҳужжатларга кўра, у «Аҳолининг санитария-эпидемиологик осойишталиги тўғрисида"ги қонунининг 39-моддаси (аҳолининг санитария-эпидемиологик осойишталиги тўғрисидаги қонун ҳужжатларини бузганлик учун жавобгарлик) ҳамда Маъмурий жавобгарлик тўғрисидаги кодекснинг 54-моддаси 2-қисмида (эпидемияларга қарши кураш қоидаларини бузиш) назарда тутилган ҳуқуқбузарликни содир этган, деб топилган. Шу модда билан БҲМнинг 20 баравари, яъни 4 460 000 сўм жарима жазоси тайинланган.
«Дарё» аввалроқ мазкур тўй ҳақида хабар берган, Ашур Тўхтаев бу ҳолатни «ўзбекчилик» дея изоҳлаганди.
