Қирғизистон парламенти спикери Канат Исаев яқинлашиб келаётган президентлик сайловларида қатнашиш мақсадида истеъфога чиқди, дея хабар берди ТАСС.
«Мен 10 январь куни бўлиб ўтадиган навбатдан ташқари президентлик сайловларида иштирок этишни ният қилмоқдаман. Шу муносабат билан парламент спикери лавозимидан истеъфога чиқмоқчиман», — деди Канат Исаев.
Унинг сўзларига кўра, бу қарор Исаевнинг ўзи раҳбар ҳисобланган «Қирғизистон» сиёсий партияси аъзолари томонидан илгари сурилган.
«Мен партиянинг қарорига рози бўлдим. Менинг ва партиянинг манфаатлари боши берк кўчага кириб қолмаслиги керак. Шунинг учун мен лавозимни тарк этишга қарор қилдим», — дея қўшимча қилди Исаев.
Яқин кунларда Қирғизистон парламентига янги спикер сайланади. Энг асосий номзод — депутат Талант Мамитов.
Қирғизистонда навбатдан ташқари президентлик сайловлари 2021 йил 10 январга белгиланган. Бугунги кунга қадар бир нечта сиёсатчилар ўзларини номзодларини илгари суриш режаларини эълон қилишди, шу жумладан Исаев ва «Бутун Қирғизистон» партияси раҳбари Адахон Мадумаров ҳам.
Эслатиб ўтамиз, октябрь ойида Бишкекда парламент сайловлари натижаларидан норози бўлган минглаб фуқаролар намойиш ўтказганди. Кейинчалик Қирғизистоннинг собиқ президенти Сооронбай Жээнбеков истеъфога чиқишини эълон қилди.
