Давлат тест маркази 2−13 сентябрь кунлари ҳамда қўшимча равишда 17 сентябрь куни ўтказилган олий таълим муассасаларининг бакалавриат таълим йўналишларига кириш тест синовлари учун сарфланган умумий маблағлар ҳақида маълумот берди.

Берилган маълумотларга кўра, Давлат комиссиясининг 19 июлдаги 1-сон баёни билан тест синовларига жалб қилинадиган бино раҳбарлари ва гуруҳ назоратчиларининг меҳнатига ҳақ тўлаш бир кунига 250 848 сўм (даромад солиғи чиқариб ташлаганда 218 238 сўм) миқдорида белгиланган. Тест синовларига гуруҳ назоратчиси сифатида Олий ва ўрта махсус таълим вазирлиги ҳамда Халқ таълими вазирлиги тизимидан 3 882 нафар педагог ходимлар жалб этилган бўлиб, гуруҳ назоратчиларининг умумий иш ҳақи 11 578 830 120 сўмни ташкил этган.

Очиқ майдонлар ижараси учун Ботаника боғи, Ўзбекистон енгил атлетика федерацияси ва Пахтакор спорт мажмуасига 127 592 394 сўм тўланган.

"Газета.uz"да реклама

Шунингдек, абитуриентларни тиббий қўлқоп, ниқоб, ичимлик суви ва ручка, бош кийимлар (кепка) билан таъминлаш учун танлов асосида шартномалар тузилган.

Тиббий ниқоблар учун 1 365 574 500 сўмлик шартнома имзоланган:

  • Энг паст нарх ва талаб даражадаги сифат SU SHI KUN МЧЖ томонидан таклиф этилганлиги сабабли, шу ташкилот билан бир дона тиббий ниқоб нархи 900 сўмдан (етказиб бериш билан бирга), жами 1 517 305 дона тиббий ниқоб учун 1 365 574 500 сўмлик шартнома имзоланган.

Тиббий қўлқоп учун 2 124 227 000 сўмлик шартнома имзоланган:

  • UZTEXTILE EXPORT МЧЖ билан бир дона тиббий қўлқоп нархи 700 сўмдан (етказиб бериш билан бирга), жами 3 034 610 дона тиббий қўлқоп учун 2 124 227 000 сўмлик шартнома имзоланган.

Ичимлик суви учун 1 365 574 500 сўмлик шартнома имзоланган:

  • энг паст нарх ва талаб даражадаги сифат NAVRUZ INTERNATIONAL KORP МЧЖ томонидан таклиф этилганлиги сабабли, шу ташкилот билан бир дона ичимлик суви нархи 900 сўмдан (етказиб бериш билан бирга), жами 1 517 305 дона ичимлик суви учун 1 365 574 500 сўмлик шартнома имзоланган.

Ручка учун 500 710 650 сўмлик шартнома имзоланган:

  • энг паст нарх ва талаб даражадаги сифат Oziq Ovqat Savdo МЧЖ (Ўзбекистонда Alfa брендидаги ручкалар ишлаб чиқарувчиси) томонидан таклиф этилганлиги сабабли, шу ташкилот билан бир дона ручка нархи 330 сўмдан (етказиб бериш билан бирга), жами 1 517 305 дона ручка учун 500 710 650 сўмлик шартнома имзоланган.

Бош кийим (кепка) учун жами 1 698 320 550 сўм сарфланган:

  • энг паст нарх ва талаб даражадаги сифат BOBURXON BN NODIRXON ОК томонидан таклиф этилганлиги сабабли, шу ташкилот билан бир дона кепка нархи 6 174 сўмдан (етказиб бериш билан бирга), жами 1 000 000 дона кепка учун 6 174 000 000 сўм, 15% ҚҚС билан бирга 7 100 100 000 сўмлик шартнома имзоланган.

Лекин корхона белгиланган миқдорда бош кийимларни етказиб бера олмагани учун дастлабки шартнома бекор қилиниб, қўшимча келишув имзоланган ва 6 174 сўмдан жами 69 506 дона бош кийимни 429 130 044 сўмга, 15% қўшимча қиймат солиғи билан бирга 493 499 550 сўмга етказиб берган.

Мазкур корхона бош кийимларни етказиб бера олмагани учун маҳаллий ҳокимиятлар томонидан таклиф этилган корхоналар билан уларда мавжуд сондаги бош кийимларни етказиб бериш бўйича шартномалар имзоланган:

  • SULTON CAP МЧЖ билан бир дона кепка нархи 10 000 сўмдан, жами 15 000 дона кепка учун 150 000 000 сўм, 15% ҚҚС билан бирга 172 500 000 сўмлик;
  • ULUGBEK BARACA TEXTILE МЧЖ билан бир дона кепка нархи 9 200 сўмдан, жами 20 000 дона кепка учун 184 000 000 сўмлик;
  • ELEGANT ZIYO BIZNES TEKSTIL МЧЖ билан бир дона кепка нархи 9 200 сўмдан, жами 10 000 дона кепка учун 92 000 000 сўмлик;
  • BAOYU TEKSTIL TRIKOTAJ SERVIS МЧЖ билан бир дона кепка нархи 8 350 сўмдан, жами 75 260 дона кепка учун 628 421 000 сўмлик;
  • Yengialsanoatsavdo МЧЖ билан бир дона кепка нархи 15 000 сўмдан, жами 5 000 дона кепка учун 75 000 000 сўмлик;
  • 2020 MEGA SERVIS SAVDO МЧЖ билан бир дона кепка нархи 11 500 сўмдан, жами 4 000 дона кепка учун 46 000 000 сўм, 15% ҚҚС билан бирга 52 900 000 сўмлик шартнома имзоланган.

Кепка бўйича жами имзоланган шартномаларнинг умумий миқдори 1 698 320 550 сўмни ташкил этган (198 766 дона кепка учун).

Гуруҳ назоратчилари ҳамда ушбу жараёнга жалб этиладиган ходимларни сифатли тушлик билан ўз вақтида таъминлаш мақсадида ҳар бир ҳудудда турли корхоналар билан шартномалар имзоланган. Бунда ҳар бир ҳудудда бир нечта корхоналар таклифи ўрганилиб, ички танлов асосида улар ичидан энг паст нарх ва талаб даражада сифат таклиф этган корхоналар танлаб олинган.

Тушлик бўйича энг катта шартнома Тошкент шаҳрида тузилган бўлиб, 13 кунга 12 610 дона тушлик (бир марталик идиш, овқат, салат, нон, сув, булочка) нинг ҳар бирига 31 000 сўмдан (етказиб бериш билан бирга) жами 390 910 000 сўмга имзоланган.

Ундан кейинги энг катта шартнома Самарқанд вилоятида имзоланган бўлиб, бунда 5467 дона тушликнинг ҳар бирига 25 000 сўмдан жами 136 675 000 сўмлик шартнома имзоланган.

Шунингдек, хабар берилишича, тушлик бўйича тузилган шартномаларнинг умумий миқдори 1 459 587 423 сўмни ташкил этган.

Эслатиб ўтамиз, аввалроқ 1 млн дона бош кийим етказиб берилиши учун 7 млрд 100 млн 100 минг сўмга шартнома тузилгани, бироқ кейинчалик корхона белгиланган миқдорда бош кийимларни етказиб бера олмагани учун дастлабки шартнома бекор қилиниб, бошқа корхоналар билан ҳам шартномалар имзолангани ҳақида хабар берган эдик.