Сингапурнинг Universal Success Enterprises компанияси Тошкент вилоятида замонавий «Нурафшон сити» шаҳрини барпо этади. Тегишли шартномани вилоят ҳокими Рустам Холматов ва компания раҳбари Прасун Мукержи онлайн тарзда имзолашди, дея хабар берди «Дунё» ахборот агентлиги.
Бўлажак шаҳарнинг умумий майдони тахминан 2,833 гектарни ташкил этади. Сингапурдан келган мутахассислар ўзбек томонининг ахборот кўмаги билан 2021 йилнинг биринчи чораги охирига қадар лойиҳанинг техник-иқтисодий асосларини ишлаб чиқишади.
Лойиҳани Universal Success Enterprises Limited ёки ушбу компания томонидан ташкил этилган хорижий компаниялар консорциуми томонидан жалб қилинган тўғридан-тўғри хорижий инвестициялар ёки хорижий молия институтларининг кредит линиялари асосида амалга ошириш кўзда тутилган.
Инвестицияларнинг умумий ҳажми лойиҳанинг техник-иқтисодий асосларини тайёрлаш натижаларига кўра аниқланади.
Эслатиб ўтамиз, 2017 йилгача Тўйтепа деб номланган Нурафшон Ўзбекистондаги биринчи «ақлли» шаҳар бўлиши режалаштирилган эди. Аввалроқ Тошкент вилояти маъмурий марказини қайта қуриш лойиҳаси жанубий кореялик мутахассислар томонидан ишлаб чиқилгани ҳақида хабар берилган эди. Кейин президент Шавкат Мирзиёев Тошкент вилоятига сафари чоғида шаҳарни «иккинчи Тошкент» деб атади.
Шунингдек, февраль ойида пойтахтдан Нурафшонгача метро линияси қурилиши режалаштирилгани маълум бўлди.
