6 октябрь куни Ўзбекистон Соғлиқни сақлаш вазирлиги Jurabek Laboratories қўшма корхонаси билан 3900 дона антивирал Ремдесса (ремдесивир) препаратини 11,9 миллиард сўмга етказиб бериш тўғрисида шартнома имзолади. Давлат харидлари сайтидаги маълумотларга кўра, ҳар бир тўплам 307,5 минг сўмни ташкил қилади.
Шартномага кўра, ҳар бир пакетга «SSV» (Соғлиқни сақлаш вазирлиги) ва «SOTISH MAN QILINADI» ёзувлари қўйилиши керак. Сентябрь ойи ўрталарида Соғлиқни сақлаш вазирлиги ҳузуридаги Ўзмедимпекс давлат унитар корхонаси коронавирус инфекциясини даволаш учун мўлжалланган дори-дармонларни сотиб олиш бўйича энг яхши таклифлар танлови натижаларини эълон қилди (август охирида эълон қилинди). Хабарда қайд этилишича, Jurabek Laboratories компанияси 6 миллиард сўмлик 20 минг флакон ремдесивир ва 4,9 миллиард сўмлик 14 минг дона ҳепарин пакетини етказиб бериш бўйича шартномани имзолашга эришди.
Jurabek Laboratoriesнинг «Газета.uz»га хабар беришича, тадбиқ этиш 21 сентябрда бошланган бўлса ҳам «Ремдесса» препарати 9 октябрда рўйхатдан ўтказилган. Масалан, 28 сентябрь куни Зангиота 2-сонли махсус касалхонаси 500 дона дори-дармонни 385,4 минг сўмдан (жами — 192,7 миллион сўм), сўнгра яна 1000 донани сотиб олган. «Газета.uz» ремдесивирнинг биринчи маҳаллий аналоги ҳақида тафсилотларни ўрганиб чиқди ва яқинда Жаҳон соғлиқни сақлаш ташкилоти Сovid-19ни даволашда самарасиз деб атаган ушбу дори тўғрисида маълумотлар тўплашга ҳаракат қилди.
«Ремдесса» ҳақида
Препаратнинг ўзи 2015 йилда АҚШ армиясининг юқумли касалликларни ўрганиш институти томонидан Gilead Sciences компанияси билан ҳамкорликда ишлаб чиқилган. Дастлаб у гепатит С ва респираторли сицитиал вирусни даволаш учун ишлаб чиқилган, аммо коронавирус пандемияси шароитида у ушбу касалликни даволаш учун ишлатила бошланди. 2020 йил 20 мартдан бошлаб, ўша пайтдаги ремдесивир АҚШ озиқ-овқат ва фармацевтика идораси (ФДА) томонидан тасдиқланмаганига қарамай, бир нечта ҳолатларда шифокорлар ундан Covid-19 билан касалланган оғир беморларни даволашда фойдаланганлар.
Бир-биридан мустақил тарзда ўтказилган иккита тадқиқот натижалари апрель ойининг охирида пайдо бўла бошлади. Кўпгина мутахассислар ремдесивир на С гепатити, на Эбола вирусига қарши самарали таъсир кучига эга бўлмаса ҳам, дори воситасининг вирус РНК-полимеразаси учун паст молекуляр ингибитор бўлишига умид боғлашди, деб ёзади «Медуза».
АҚШ Миллий Соғлиқни сақлаш институти (NIH) томонидан 1062 беморда ўтказилган биринчи тадқиқот шуни кўрсатдики, оғир беморларда ремедесивир ўртача тикланиш вақтини 15 кундан 10 кунгача қисқартирган. Шунингдек, бу ўлим кўрсаткичининг 11,6% дан 8% гача пасайиш тенденциясини кўрсатди. Ушбу дори, даволовчи восита бўлмасада, касалхонага ётқизилган беморларни даволаш учун фойдали бўлиши мумкинлиги маълум бўлди (бу амбулатор даволаниш учун кўриб чиқилмаган, чунки дори укол қилинади).
Ушбу натижаларга асосланиб, ремдесивир учун 1 май куни Қўшма Штатларда оғир касал беморларда шошилинч фойдаланиш учун вақтинчалик рухсат олинди. Кейин ремдесивир Европа Иттифоқида ва бошқа баъзи мамлакатларда худди шундай шароитларда тасдиқланди. Август ойида вақтинча рухсатнома касалхонага ётқизилган барча катталар ва педиатрик беморларга, касалликнинг оғирлигидан қатъи назар, узайтирилди.
Тадқиқотнинг якуний натижалари 8 октябрда эълон қилинди ва улар ўлимнинг 15-куни 11,9% дан 6,7% гача ва касалликнинг 29-кунида 15,2% дан 11,4% гача камайганлигини кўрсатди.
Мақоланинг тўлиқ версиясини рус тилида ўқишингиз мумкин.
