Россиянинг Волгоград вилояти Волжский шаҳридан Ўзбекистон фуқароларини Тошкентга олиб келиш учун октябрь охири, ноябрь бошида тўққизта махсус поезд қатновга қўйилади. Бу ҳақда Волжский темир йўллари компанияси хабар бермоқда.
Таъкидланишича, аввалига поезд қатнови бешта этиб режалаштирилганди. Икки томонлама келишув натижасида поездлар сони яна тўрттага ортган. Поездлар «Волжский» бекатидан 22, 23, 25, 26, 28, 29, 31 октябрь ҳамда 1 ва 2 ноябрь кунлари Волжский — Тошкент йўналишида Россия вақти билан соат 21:57 да қатновни бошлайди.
Ҳар бир поезд таркибида 938 нафар йўловчига мўлжалланган 20 тадан вагон бўлиб, улар Россия ҳудуди бўйлаб тўхтамасдан ҳаракат қилади. Чипталар сотувда мавжуд.
Интекфакс нашрининг ёзишича, Россия Транспорт вазирлиги ҳамда «Россия темир йўллари» сентябрь ойининг охири, октябрь ойининг бошида Ўзбекистон фуқароларини ватанига қайтариш учун Волжский — Тошкент йўналишида ўнта махсус поезд ташкил қилган. Умумий ҳисобда 11 мингдан ортиқ ўзбекистонлик ўз юртига қайтарилган.
