Транспорт вазирлиги Тошкентда метро ва автобус йўловчилари учун кунига ўртача 28 млн сўмлик қўлқоп харид қилинаётгани ҳақидаги хабар бўйича муносабат билдирди.
19 октябрдан бошлаб жамоат транспортида тиббий ниқоблардан ташқари, тиббий қўлқоп ёки бир марталик қўлқопларсиз ҳаракатланиш тақиқланиши ва бир марталик қўлқоплар йўловчиларга бепул тақдим этилиши ҳақидаги хабар эълон қилинган эди.
Шундан келиб чиққан ҳолда жамоат транспортларида йўловчиларни бепул қўлқоплар билан таъминлаш мақсадида «Тошшаҳартрансхизмат» Акциядорлик Жамияти, OOO «POLIPLAST DIZAYN» ҳамда OOO «BIZNES TECH MIR» корхоналари билан бир марталик қўлқопларни харид қилиш бўйича музокаралар олиб борган. Музокаралар натижасига кўра:
«POLIPLAST DIZAYN» МЧЖбир жуфт қўлқопни — 56 сўм;
«BIZNES TECH MIR» МЧЖ бир жуфт қўлқопни — 70 сўмдан тақдим этиши маълум бўлди.
«Тошшаҳартрансхизмат» АЖ юқоридаги икки корхонадан энг маъқули OOO «POLIPLAST DIZAYN» деб топиб, шартнома имзолади.
Ҳозирги вақтда «Тошшаҳартрансхизмат» АЖ автобусларга бир кунда 300 минг дона бир марталик қўлқоплар тарқатилаётганини маълум қилади. Демак бир кунда 16 миллион 800 минг сўмлик маҳсулот OOO «POLIPLAST DIZAYN» корхонасидан харид қилинмоқда, дейилади хабарда.
Вазирлик бир марталик қўлқопларнинг кунлик ҳажмини янада кўпайтириш мақсадида «Тошшаҳартрансхизмат» АЖ полиэтиленли бир марталик қўлқоплар ишлаб чиқарувчи тадбиркор ва ишбилармонларни, янада қулай таклифлар бўйича ҳамкорликка чақиришини эслатиб ўтди.
Аввалроқ Kun.uz нашри Транспорт бошқармасига таяниб Тошкентда метро ва автобус йўловчилари учун кунига ўртача 28 млн сўмлик қўлқоп харид қилинаётгани ҳақида хабар берган эди.
