Европа Иттифоқининг қатор мамлакатлари COVID-19 касаллигига чалиниш ҳолатлари кўпайиб бораётгани сабабли карантин чекловларига қайтишмоқда. Европа касалликларни назорат қилиш ва олдини олиш марказининг сўнгги маълумотларига кўра, ЕИнинг учдан икки қисми — 28 давлатдан 19 таси «қизил ҳудуд»га киритилган. Сўнгги икки ҳафта ичида у ерда кунига 100 минг кишига ўртача 150 дан ортиқ янги касалланиш ҳолатлари қайд этилган.
«Қизил ҳудуд» таркибига Испания, Португалия, Франция, Ирландия, Буюк Британия (шу йил охиригача Европа Иттифоқининг бир қисми сифатида қаралмоқда), Бельгия, Полша, Чехия, Нидерландия ва бошқалар киритилган. Италия, Швеция, Германия, Болтиқбўйи мамлакатлари «тўқ сариқ ҳудудда».
14 кун ичида 100 минг аҳолига тўғри келадиган рўйхатдан ўтказилган янги ҳолатлар.
Испаниянинг шимолий қисмида жойлашган Наварра автоном вилояти ҳукумати коронавирус тарқалишини тўхтатиш учун 22 октябрдан бошлаб икки ҳафта давомида вилоятга кириш ва чиқиш йўлларини тўлиқ ёпди. Илгари мамлакатда фақат алоҳида шаҳарлар ёпилган эди.
21 октябрдан бошлаб Ирландия аҳолисининг ўз уйларидан беш километр узоқликда ҳаракатланиши тақиқланади. Узоқроқ масофага фақат ишлаш ёки касалхонага бориш мумкин. Бошқа уйдагилар билан учрашиш фақат очиқ ҳаво шароитида рухсат этилади.
Эпидемия ҳолати ёмонлашгани сабабли Франциянинг йирик шаҳарларида, шу жумладан Парижда 17 октябрдан бошлаб фавқулодда ҳолат жорий этилди, у соат 21:00 дан 6:00 гача амал қилади, дея хабар берди Euronews. Ҳокимият буйруғининг бажарилишини назорат қилиш учун қўшимча равишда 12 минг полициячи жалб қилинди.
Бельгия коронавирус билан касалланганлар сони кўпайганлиги сабабли бутун мамлакат бўйлаб бар ва ресторанларни бир ойга ёпиб, фавқулодда ҳолат жорий қилишга қарор қилди, дея хабар берди РБК. Бундан ташқари, иш берувчилар ўз ходимларининг катта қисмини масофадан туриб ишлаш тизимига кўчиришини шарт қилиб қўйилди.
Чехия ҳукумати ўтган ҳафта кафе, кинотеатрларни ёпиш ва спорт тадбирларини ўтказишни тақиқлашга буйруқ берган. Янги қоидалар спорт мухлисларига ёқмади ва бошқа фуқаролар билан биргаликда Прагадаги чекловларга қарши митингга чиқди, деб ёзади TJ. Тинч намойишлар полиция билан қаттиқ тўқнашувларга сабаб бўлди. Намойишчилар полиция кучларига қарши пиротехника, шиша ва тошлар улоқтиришди, полиция намойишчиларни сув пуркагич, қалампирли газ ва резина таёқлар ёрдамида тарқатиб юборди.
