Ўзбекистон президенти Шавкат Мирзиёев журналист Бобомурод Абдуллаевга Тошкентдаги Green Park турар жой комплексидан уч хонали квартира совға қилди. Бу ҳақда 18 октябрь куни журналист ўзининг Facebook`даги саҳифасида эълон қилди.

Унинг сўзларига кўра, хонадон маиший техникадан тортиб барча керакли мебеллар билан жиҳозланган. У янги хонадонга 5 октябрь куни кўчиб ўтган. Унинг уйига Хоразмдан онаси ҳам ташриф буюрган. Бобомурод Абдуллаев давлат раҳбарига миннатдорчилик билдирди.

«Шу йилнинг 8 сентябрь куни ҳурматли президентимиз Шавкат Миромонович Мирзиёев менга мана шу барча жиҳозлари, маиший техника, гилам, мебеллари билан бирга уч хонали уй ҳадя қилдилар», — деди у квартирадан олинган видеолавҳада.

Видеолавҳадан олинди.

8 август куни Бобомурод Абдуллаев Бишкекда Ўзбекистон томони талабига биноан қўлга олинганди (Ўзбекистон Бош прокуратураси қайси айблов билан уни қўлга олишганини аниқлаштирмаган). 22 август куни у Ўзбекистонга экстрадиция қилиниб, шу куниёқ хулқ-атвор қиодаларига риоя қилиши тўғрисидаги тилхатга асосан озод этилди.

Журналистнинг Бишкекда қўлга олинганидан сўнг, унинг онаси президентга видеомурожаат йўллаб, ўғлини озодликка чиқаришини сўраган. Унда Бобомуроднинг онаси ўғли ноқулай шарт-шароитда яшаётганини ҳам айтиб ўтганди. Аниқлик киритиш мақсадида Бобомурод Абдуллаев онаси квартира олиш мақсадида видеомурожаат йўлламаганини таъкидлади.

Бобомурод Абдуллаевнинг онаси совғадан жуда хурсанд эканини айтиб, президентга миннатдорчилик билдирди.

2017 йилда Бобомурод Абдуллаев ва яна уч киши Ўзбекистон Конституциявий тузумига тажовуз қилишда айбланиб қўлга олинганди. 2018 йилнинг май ойида суд Бобомурод Абдуллаевни жиноят содир этишда айбдор деб топди ва уни қамоқдан озод қилиб, аҳлоқ тузатиш ишларига ҳукм қилди. Ишнинг бошқа иштирокчилари оқланди.