Қирғизистон парламентига такрорий сайловлар тахминан 20 декабрга белгиланиши мумкин, деб хабар берди AKИpress мамлакат Марказий сайлов комиссияси раиси Нуржан Шилдабековага таяниб.
Аввалроқ, МСК 4 октябрь куни бўлиб ўтган Жогорку Кенеш сайлови натижаларини бекор қилган эди. Натижалар эълон қилингандан кейин Бишкекда мухолифатнинг оммавий норозиликлари бошланди.
Муддатидан олдинги президент сайловлари эса парламент томонидан белгиланади, деди Қирғизистон МСК раҳбари. Улар шартли равишда 17 январь куни ўтказилади, дея қўшимча қилди у.
Аввалроқ Сооронбай Жээнбеков мамлакатда давом этаётган сиёсий инқироз ортидан президентликдан кетишини эълон қилган эди. Автомат равишда давлат раҳбари вазифасини бажарувчига айланган парламент спикери Канат Исаев ҳам истеъфога чиқди. Бош вазир Садир Жапаров президент вазифасини бажаришга киришди.
