Владимир Путин коронавирусга қарши иккинчи вакцина рўйхатдан ўтганлигини эълон қилди
Фото: kremlin.ru
Новосибирск «Вектор» вирусология ва биотехнология илмий маркази «ЭпиВакКорона» деб номланган коронавирусга қарши Россиянинг иккинчи вакцинасини рўйхатдан ўтказди. Бу ҳақда Россия президенти Владимир Путин ҳукумат аъзолари билан учрашувда маълум қилди. «Менинг билишимча, бизда учинчи вакцина навбатда турибди», — дея қўшимча қилди президент. — Медуза
Хитой иқтисодиёти янги рекорд ўрнатди
Хитой фонд бозорида савдога қўйилган барча компаниялар акцияларининг қиймати 10,08 трлн долларга етиб, мамлакат иқтисодиёти янги рекорд ўрнатди. Бундай кўрсаткич Хитой иқтисодиёти 2015 йилда ўрнатган аввалги 10,05 трлн рекордни янгилади. Мутахассиларнинг фикрларига кўра, Хитой бозори коронавирус пандемияси шароитида бу йил март ойида бозор қулаганидан бери 3 трлн доллардан кўпроқ қийматга кўпайди. Бунга маҳаллий ҳокимиятларнинг қимматли қоғозлар савдосини қўллаб-қувватлаш сиёсати, Хитой компанияларининг бир қатор бирламчи оммавий таклифлари ва юаннинг мустаҳкамланиши ёрдам берди. — Bloomberg
Арманистон бош вазири «янги Гитлер» пайдо бўлиши эҳтимолини айтди
Фото: primeminister.am
Aрманистон бош вазири Никол Пашинян «янги Гитлер» пайдо бўлиши эҳтимоли ҳақида огоҳлантирди. Бош вазир қўшни давлатлар раҳбарларидан қайси бирини назарда тутганига аниқлик киритмади, аммо Кичик Осиёда «янги Гитлер» пайдо бўлиши мумкин деган фикрни билдирди. Пашинян дунё жамоатчилигини бунинг олдини олишга чақирди. Бош вазир шунингдек, Озарбайжоннинг Тоғли Қорабоғни блицкриг ёрдамида тортиб олиш стратегиясининг барбод бўлганини таъкидлади. — РИА Новости
Нурсултонда карантин чоралари кучайтирилди
Қозоғистон пойтахти Нурсултонда COVID-19 касаллигининг аҳоли орасида кенг тарқалаётгани сабаб 14 октябрдан бошлаб янги карантин чоралари жорий этилди. Маҳаллий ижро этувчи ҳокимият органлари ва давлат сектори ходимларининг камида 60 фоизи масофадан туриб ишлашга ўтишади. Хусусий ташкилотларга ҳам масофадан ишлашга ўтиш маслаҳат берилган, аммо ҳозирча фақат тавсия сифатида. Соғлиқни сақлаш вазирлигининг таъкидлашича, меҳнат жамоалари инфекция тарқалишининг асосий ўчоғига айланган. — Газета.uz
Blue Origin Ойга қўниш тизимини синаб кўриш учун ракета учирди
Amazon компаниясининг бош директори Жефф Безос томонидан асос солинган Blue Origin аэрокосмик компанияси 13 октябрь куни келажакда Ойга қўниш тизимининг таркибий қисмларини синовдан ўтказиш учун кўп бор қўлланилиши мумкин бўлган New Shepard ракетасини суборбитал парвозга учирди. — Газета.uz
Apple янги iPhone 12 смартфонини тақдим этди
13 октябрь куни Apple компанияси Apple Event онлайн тақдимотини ўтказди. Тақдимотда HomePod mini портатив «ақлли» карнайи, iPhone 12, iPhone 12 mini ва iPhone 12 Pro смартфонлари намойиш этилди. — Газета.uz
