Amazon компаниясининг бош директори Жефф Безос томонидан асос солинган Blue Origin аэрокосмик компанияси 13 октябрь куни келажакда Ойга қўниш тизимининг таркибий қисмларини синовдан ўтказиш учун кўп бор қўлланилиши мумкин бўлган New Shepard ракетасини суборбитал парвозга учирди, дея хабар берди Интерфакс.
Тизимдан 2024 йилда Artemis дастури доирасида икки нафар америкалик астронавтни Ой юзига қўниши учун фойдаланилиши мумкин.
Ракета Техасдаги синов майдончаси орқали учирилди. Ташувчи ракетадан ажралиб чиққанидан сўнг, капсула тахминан 100 км баландликка кўтарилди ва у кейин парашютлар ёрдамида Ерга қайтади. Айни пайтда, ташувчи ракета вертикал ҳолатда автоматик қўниши керак бўлади.
Ушбу парвоз бу ракетанинг еттинчи ва New Shepard лойиҳаси доирасида эса 13-марта учирилиши. Ракетанинг аввалги парвози 2019 йил 11 декабрда муваффақиятли амалга оширилган. Ўшанда ракета 104,5 км баландликка кўтарилган. Ташувчи ракета бошқарув орқали қўнишни амалга оширган, капсула эса парашютлар ёрдамида Ерга қайтган.
New Shepard бортида 12 та илмий асбоб-ускуналар, шу жумладан NASA ускуналари ўрнатилган бўлиб, улар космик кеманинг Ой юзасига қўниш жараёнини таъминлайди. Бу ускуналар ракетанинг ташқи томонида жойлашган конвергенция, тушиш ва қўниш датчиклари тизимини ташкил қилади.
«Тажриба ушбу технологиялар (датчиклар, компьютерлар ва алгоритмлар) кеманинг жойлашуви ва ойга яқинлашиш тезлигини аниқлашда ўзаро таъсирини синаб кўради, бу эса ой сатҳига олдиндан белгиланган нуқтадан 100 м узоқлик даражасида қўнишга имкон беради», — деди Blue Origin компанияси вакиллари.
Ҳозирда Blue Origin дан ташқари NASA билан тузилган шартнома асосида SpaceX ва Dynetics ҳам Ойга қўнувчи қурилмани яратишда иштирок этмоқда. Ушбу техник лойиҳаларнинг энг яхшиси 2024 йилда астронавтларнинг Ойга қўниши учун қўлланилади.
Яқин келажакда Blue Origin ўз ракетасини суборбитал сайёҳлик парвозлари учун ишлатмоқчи. Бироқ, компания ҳанузгача космосга бортда одам мавжуд бўлган парвозларни амалга оширмаган.
