Яқинда Италиянинг «Женоа» футбол жамоаси сафига қўшилган ўзбекистонлик футболчи Элдор Шомуродов Sport24 мухбири билан суҳбат давомида қандай қилиб Итали А серияси клубига қўшилгани, келажакдаги режалари ва болаликдаги орзулари ҳақида гапириб берди.

— Сиз ва «Женоа», бу қандай содир бўлди?

— Ҳаммаси жуда тез рўй берди. Менга Кахор (Мўминов — ProSport Management вакили) қўнғироқ қилди ва шундай вариант бор, уриниб кўриш керак деди. Мен бунга тезда розилик билдирдим. Мен болалигимдан Европада тўп суришни орзу қилар эдим. Бошиданоқ шунга интилганман. Қайси мамлакат ёки қайси клуб эканлигини фарқи йўқ, мен айнан Европада ўзимни синаб кўришни, нимага қодир эканлигимни кўришни хоҳладим.

— Сўнгги пайтларда «Верона» ва «Фиорентина» сизни ўзига қўшиб олишни истаётганликлари ҳақида хабарлар пайдо бўлган эди. Сиз ушбу вариантларни кўриб чиққанмидингиз ёки бошиданоқ Генуя клубига тўхталганмидингиз?

— Мен бу ҳақда интернет орқали хабар топдим. Лекин бу пайтга келиб биз «Женоа» клуби билан сўнгги деталларни келишишга улгурган эдик. Бошқа вариантлар ҳақида ўйламаган эдим.

— Бу йил ёзда сизда бошқа вариантлар ҳам бўлганмиди?

— Испаниядан. Бельгиядан «Генк» клуби бор эди. Бунгача, йил бошида «Штутгарт» варианти ҳам мавжуд эди.

— «Женоа» варианти пайдо бўлганда Карпин («Ростов» клуби бош мураббийи — таҳр.) нима деган эди?

— Мен унга ўзимни синаб кўрмоқчилигимни айтдим. У «футболчи сифатида сени тушунаман, мураббий сифатида эса кетишингни хоҳламаган бўлар эдим, сен менга «Ростов»да кераксан», деган эди. У агар клуб раҳбарияти трансферни тасдиқлашса, бунга тўсқинлик қилмаслигини айтди. Мен ундан ва клубдан менинг орзуимни тушунгани учун жуда миннатдорман.

— «Женоа»да сиз 61-рақамни танладингиз. Бу Ростов вилоятининг ҳудудий коди, шундайми?

— Бу ғояни менга дўстим таклиф қилди. У «агар рақам борасида бир қарорга келмаган бўлсанг, 61 ни танла, бу бизнинг вилоятнинг коди, ростовлик мухлисларга бу ёқади деб ўйлайман» деди.

— Айтайлик, «Зенит» таклиф билдирганида, барибир «Женоа» га кетган бўлармидингиз?

— Кетган бўлар эдим, албатта. Чунки мен бошиданоқ агентимга «биринчи навбатда Европа, кейин бошқа нарсалар» деб келганман. Чунки менда аввалдан бери Қатар, Саудия Арабистони ва Хитой вариантлари бўлган, лекин мен уларга ҳатто қизиқмас эдим. Пул асосийси эмас.

— Кейинги сафар Ўзбекистонга қайтганингизда ўзингиз билан қанча «Женоа» футболкасини олиб келасиз?

— Тасаввур қилишим қийин. Менимча, бир катта сумкани тўлдириб келсам керак. Лекин бу албатта менинг қандай ўйин кўрсата олишимга боғлиқ. Агар яхши ўйнаб кета олсам — жамадон ҳам камлик қилади. Ёмон ўйнасам ҳеч ким мени футболкамни олмайди.

Маълумот учун, Элдор Шомуродов сентябрь охирида Италиянинг «Женоа» футбол клуби сафига қўшилган эди. Генуяликлар футболчи учун «Ростов» клубига 7,5 млн евро ҳақ тўлашди. Ўзбекистонлик футболчига ушбу клубдан ташқари яна «Фиорентина» ва «Верона» каби Италия клубари қизиқиш билдираётган эди.