Тошкентнинг Мирзо-Улуғбек тумани Оққўрғон маҳалласида яшовчи, турмуш ўртоғини уриб, боланинг нажасини ейишга мажбур қилган эркак Zo’r TV телеканалининг «Бу кун» дастурига берган интервьюсида ўз қилмишининг сабаблари ҳақида сўзлаб берди.

Аввалроқ хабар қилганимиздек, 1 октябрь куни 46 ёшли Рустам И. турмуш ўртоғини калтаклаб, ўлдириш билан таҳдид қилиб унга фарзандининг нажосатини зўрлаб едирган, шунингдек, қизини бу жараёнларни камерада тасвирга олиш мажбурлаган эди. Жабрланувчининг сўзлари ва видеоёзувлар зўравонликка қарши «Немолчи.Уз» («Сукут сақлама») лойиҳаси томонидан эълон қилинди.

Хабар қилинишича, эркак 14 йил давомида хотини ва болаларини мунтазам равишда калтаклаб, психологик ва иқтисодий зўравонликларга дучор қилиб, хўрлаган. Тошкент ИИББ хабарига кўра, мазкур ҳолат бўйича Мирзо Улуғбек тумани ИИБ ҳузуридаги тергов бўлими томонидан Ўзбекистон Жиноят кодексининг 110-моддаси 1-қисми («Қийноққа солиш») бўйича жиноят иши қўзғатилди. Рустам И. ҳибсга олинган.

Бошқарманинг қўшимча қилишича, 7 октябрь куни жабрланувчига ҳимоя ордери тақдим этилган. Ҳозирда аёл ва унинг вояга этмаган болалари хотин-қизларни реабилитация қилиш ва мослаштириш марказига вақтинча жойлаштирилган.

Рустам И. интервьюда уйига қайтса, ваннада боласининг нажосати бўлган тувакни кўрганини айтди.

«Бир куни келсам, соат кечаси 9, қизимнинг ахлати мана шундай бўлиб турибди. Анавиниси (таглиги) хўл бўлиб ётибди. Қарашмаган, фақат телефонда ётишибди. Кейин мен қизимни уришдим: „Ҳой, нима қилаяпсизлар сизлар?“… Ваннага кирмоқчи эдим, кирсам [ахлат устига] ҳожатхона қоғозларини ташлаган, ичида майда пашшалар учиб юрибди. Кўрмадингларми, мени соат 9 гача пойладингларми (кутдингларми), десам, „Вой, энди сиз яхши қиласиз-да, шампунлар билан яхшилаб тозалаб қўясиз-да“… Кейин қизимни уришдим. „Вой, дада, ўзингиз қиласизку, биз тегинмаймизку“, — дейди», — деди у.

Эркакнинг сўзларига кўра, жаҳли чиққан ва тувакни чаноққа отиб юборган. «Бориб ювинглар, ахлатни ҳиди сизларга ёқаяптими, мана, енглар шу ахлатни, дедим. Шунчалик қарамабсизлар. Жаҳл устида гапирдим-да, сочиғимни олиб, ошхонага кириб ювиндим озгина ўзимга келай, деб. Қизим унгача келиб, расмларга олиб юрибди. Кейин кирдимда узун ёғоч турганди, ўшани олиб, хотиним гап қайтарганди, уч-тўрт марта урдим қўлига қараб. Видеони ўша қизим чиқарди, ўн уч яшар қиз, у ҳеч нарсани тушунмайди», — дейди қўлга олинган шахс.

Рустам И. 15 йил давомида болаларининг орқасидан тозалаб келганини, бу иш аслида аёл кишининг иши эканини таъкидлади.

«Майли, мен буни бировга гапирмасдим. Оиламизни ичида эди бу. Охириги газак олиб, мана бунақасига тўлдириб, тўққизгача ўтиришгани, сасиб, чивин тўпланиб турганини кўрганимдан кейин… Мен айбдорман, ўзимни оқламайман. Лекин соат 9 да бунақа иш қилиш керак эмас эди», — деди у.

Туман ИИО ФМБ катта терговчиси Дилмурод Хўжанов айбланувчи қисман ўз айбини тан олгани, ўз ҳаракатларини қасддан содир этмагани, ғазаб устида қилганини келтириб ўтганини маълум қилди. Жабрланувчилар, гувоҳлар, вояга етмаган икки нафар фарзанди, қўни-қўшнилари, яқин қариндошлари сўроқ қилиниб, кўрсатмалари олиниб, якуний қарор қабул қилинади. Тергов давом этмоқда.