9 октябрь куни Қирғизистон президенти Сооронбай Жээнбеков қирғиз халқига мамлакатдаги мавжуд сиёсий вазият билан боғлиқ яна бир мурожаат билан чиқди, дея хабар берди «Кабар».
Мурожаатда у «мамлакатда сиёсий вазият жуда муҳим нозик нуқтага етганини» таъкидлаб, ижроия ҳокимиятининг қонуний раҳбарлари тасдиқланиб, мамлакат қонунийлик йўлидан боришни бошлаши билан президентликдан кетишга тайёрлигини айтди. Сооронбай Жээнбеков вазиятни тўғрилаш учун зарур бўлган шартларни санаб ўтди.
«Жогорку Кенешга сайлов натижалари бекор қилинди. Энди янги парламент сайловлари тайинланиши керак. Ушбу масала бўйича қарор МСК томонидан қабул қилинади. Ушбу чоралар ҳозирги мавжуд сиёсий кескинликни камайтиради», — деди президент.
«Шу билан бирга, инқироздан олдин ишлаган бош вазир ва ҳукумат аъзоларини ишдан бўшатиш керак, бу эса янги тайинловлар учун ҳуқуқий асос яратади. Янги бош вазир ва ҳукумат аъзоларини тайинлашни қонунийлаштириш учун Жогорку Кенешнинг қарори ва президент фармони керак. Тегишли фармонларни имзолашга тайёрман, Жогорку Кенешнинг қарорларини кутаман», — деди у.
Парламент аъзолари ўз вазифаларини бажара олишлари учун ҳуқуқни муҳофаза қилиш идоралари Жогорку Кенеш депутатлари хавфсизлигини таъминлаши шарт, дея қўшимча қилди Сооронбай Жээнбеков.
«Аввал айтиб ўтганимдек, мен давом этаётган кадрлар алмашинувини қонунийлаштирмоқчиман. Мен учун ҳеч қандай лавозим давлат яхлитлигидан, халқ бирдамлигидан ва жамият тинчлигидан юқори эмас», — дея таъкидлади у.
«Мавжуд вазиятни иложи борича тезроқ тиклашимиз керак. Ижро этувчи ҳокимиятнинг қонуний раҳбарлари тасдиқлангандан ва мамлакат қонунийлик йўлидан борганидан сўнг, Қирғизистон Республикаси президенти лавозимини тарк этишга тайёр», — деди давлат раҳбари.
У барча сиёсий кучларни «мамлакатда тинчлик ва осойишталикни сақлашга, одамларни бўлишиб олиб, жамиятнининг тарқоқ бўлишига олиб келмасликка» чақирди.
5 октябрь куни минглаб одамлар Бишкекда бўлиб ўтган парламент сайловлари натижаларига норозилик билдириб, намойишларга чиқди. Эртаси куни Марказий сайлов комиссияси сайлов натижаларини бекор қилишга мажбур бўлди.
