29 сентябрь куни Наманганда 35 ёшли аёл МИБ ходимларининг кўз ўнгида ўзига ўт қўйиб, ҳалок бўлди. Kun.uz нашрининг ёзишича, аёл фирибгарлик қурбони бўлган. Унинг онасига уйни 13 минг долларга алдаб сотган аёлга озодликни чеклаш жазоси қўлланилган, уйнинг асл эгаси эса мулк ўзига қайтарилиши учун судга мурожаат қилган.

Ижтимоий тармоқларда тарқалган видеолавҳада аёл киши ҳуқуқни муҳофаза қилувчи органлар ходимлари ва бошқа фуқаролар олдида уйдан мажбурий тартибда кўчиш талабига қаршилик кўрсатаётгани акс этган.

МИБ матбуот хизматининг «Газета.uz»га хабар беришича, фуқаролик ишлари бўйича Наманган туманлараро судининг 2019 йил 8 октябрдаги йилдаги қарорига кўра ундирувчи Д.А. фойдасига жавобгар Д. М. ва унинг оила аъзоларини Наманган шаҳар, Истиқбол МФЙ, 9-Боғи-эрам кўчаси 34-уйдан мажбурий тартибда кўчириш белгиланган.

Жавобгар М.Д. ва унинг оила аъзоларига низоли уйдан чиқиб кетишлари кераклиги тушунтирилиб, ижро ҳужжати талаби бажарилмаган тақдирда унга нисбатан Ўзбекистон Республикаси МЖтКнинг 198−1-моддасига асосан жарима жазоси қўлланиши ҳамда мажбурий тартибда кўчирилиши тўғрисида бўлим давлат ижрочиси томонидан 2019 йил 6 декабрда огоҳлантириш хати берилган.

Қарздор М.Д. ва унинг оила аъзолари давлат ижрочисининг оғзаки ва ёзма огоҳлантиришига қарамасдан суднинг ижро варақасида кўрсатилган хонадонни бўшатишдан бўйин товлагани учун давлат ижрочиси томонидан ижро ҳужжатида кўрсатиб ўтилган манзилдан 2019 йил 12 декабрь куни кўчириш ҳаракатларини мажбурий ижро этиш тайинланиб, бу ҳақида қарздорнинг ўзи ва тегишли ташкилотларга маълум қилинган. Бироқ, жавобгар М.Д. томонидан кассация тартибида шикоят келтирилгани сабабли юқоридаги қарор ижросини вақтинча тўхтатиш ҳақидаги суднинг ажрими қабул қилинган ва ижро ҳаракатлари тўхтатилган. Шундан сўнг, суд ажрими билан кассация шикоятини қабул қилиш рад қилинган ва ижро ҳаракатлари давом эттирилган.

2020 йил 11 март куни ушбу хонадонга мажбурий ижро ҳаракатларини ўтказиш учун тегишли ташкилот ходимлари ва холислар иштирокида борилганда қарздор М.Д. уйда йўқлиги сабабли ижро ҳаракатлари кейинга қолдирилган. Шундан сўнг Вазирлар Маҳкамасининг 23 мартдаги «Коронавирус инфекцияси тарқалишига қарши қўшимча чора-тадбирлар тўғрисида"ги қарори қабул қилинган бўлиб, унга биноан идоравий бўйсунувидан ва ташкилий-ҳуқуқий шаклидан қатъи назар барча ташкилотларда карантин ҳолати жорий қилингани сабабли, ижро ҳужжати ижросини таъминлаш 15 августга қадар тўхтатиб турилган.

Ижрони таъминлаш мақсадида давлат ижрочиси томонидан 17 сентябрда ижро ҳужжати бўйича томонлар бюронинг Наманган шаҳар бўлимига чақиртирилиб, уларга ижро ҳужжати талаби қайтадан тушунтирилган. Шу билан бир қаторда, ижро ҳужжати талабини бажармасликнинг ҳуқуқий оқибатлари ҳам тушунтириб ўтилган, манзилдан ихтиёрий равишда кўчиш таклиф қилинган.

«Бироқ, жавобгар М.Д. ва унинг оила аъзолари кўрсатиб ўтилган низоли хонадондан ихтиёрий равишда кўчиб чиқиб кетмагани сабабли, давлат ижрочиси томонидан шу йил 29 сентябрь куни кўчириш ҳаракатларини мажбурий ижро этиш тайинланиб, бу ҳақда қарздорнинг ўзи ва тегишли ташкилотларга (Наманган шаҳар ИИО ФМБ 2-ИИБ, ФВВ ЁХБ Наманган шаҳар бўлими, МФЙ, ТТЁ Наманган шаҳар бўлими) маълум қилинган.

Шу куни юқоридаги манзилга борилганда, қарздор М.Д. ва унинг қизи Д.Г. томонидан ижро ҳаракатларини амалга оширишга фаол қаршилик кўрсатилган. Ижро ҳужжати талабини бажаришга тўсқинлик қилиш мақсадида 1985 йилда туғилган Д.Г. ўзига бензин ёқилғисини сепиб, ёқиб юбориб, ўз жонига суиқасд қилган", дейилади МИБ баёнотида.

Фуқаро Д.Г. танасининг 80 фоиздан ортиқ куйиш тан жароҳати натижасида 30 сентябрь куни РШТЁИМ Наманган филиалида вафот этган.

Ҳозирда ҳолат юзасидан Наманган шаҳар прокуратураси томонидан жиноят иши қўзғатилган ва тергов ҳаракатлари олиб борилмоқда.

МИБ матбуот хизмати марҳума Д. Г. нинг оила аъзолари ва яқинларига ҳамдардлик билдириб, ҳолат бўйича айбдор шахсларга нисбатан тегишли чора кўрилишини маълум қилди. Шунингдек, ушбу ҳолат бўйича ижтимоий тармоқлардаги тарқатилаётган хабарлар тўғри ва объектив ҳолда талқин қилиниши ва бир томонлама ёндашилмаслигини сўради.