Президент Шавкат Мирзиёев 28 сентябрь куни техник жиҳатдан тартибга солиш, стандартлаштириш, сертификатлаш ва метрология тизимидаги ислоҳотлар натижадорлиги муҳокамасига бағишланган йиғилиш ўтказди, дея хабар берди президент матбуот хизмати.
Таъкидланишича, мамлакатда сўнгги йилларда стандартларнинг 43 фоизи халқаро меъёрлар билан уйғунлаштирилиб, уларнинг сони 12 мингтага етказилган.
Мисол учун, 21 та корхонада тўқимачилик ва трикотаж товарларига Европанинг OEKO-Tex ва Sedex стандартлари жорий қилинди. Жумладан, Андижондаги Samo Textile Европа бозорларига 5 миллион долларлик маҳсулот билан чиқди. Бухородаги Bukhara Cotton Textile ҳам АҚШ, Германия, Буюк Британия ва Туркияга 5 миллион долларлик экспорт қилди, дейилади хабарда.
Шунингдек, маиший техника, кабель, тиббиёт буюмлари ишлаб чиқарувчи корхоналарда 17 турдаги маҳсулот хавфсизлигини тасдиқловчи машҳур CE маркировкаси жорий этилгани натижасида Европанинг 8 та давлатига экспорт бошланди.
Шавкат Мирзиёев «Ўзстандарт» агентлигини миллий орган мақомига олиб чиқиш, корхоналарда янги стандартларни манзилли жорий қилиш асосий вазифа эканини таъкидлади.
«Миллий стандарт «овози жаранглаши»га эришишимиз керак», — деди Шавкат Мирзиёев.
Кейинги йил якунига қадар халқаро стандартлар сонини 14 мингтага, уйғунлик даражасини 50 фоизга етказиш вазифаси белгиланди.
Шу билан бирга, халқаро стандартларни татбиқ қилаётган корхоналарга кўмаклашиб, бунга кетадиган харажатнинг бир қисмини Экспортни рағбатлантириш агентлиги томонидан қоплаб бериш муҳимлиги таъкидланди.
«Агар маҳсулот халқаро сертификатга эга бўлмаса, у ҳеч қачон рақобатбардош бўла олмайди. Мамлакатда ҳар бир тадбиркор стандартни билиши, таниши керак, шундай муҳит яратиш зарур», — дея таъкидлади Президент.
«Ўзстандарт» агентлигига автомобиль компонентлари, кимё, озиқ-овқат, қурилиш материаллари тармоқларида халқаро стандартларни жорий этиш бўйича 2021 йилга мўлжалланган «йўл хариталари» ишлаб чиқиш топширилди.
Фото: Президент матбуот хизмати
Завод ва фабрикалар ўз маҳсулотларини бозор талаблари асосида такомиллаштириб бориши учун ишлаб чиқарувчилар имкониятини чеклаётган меъёрларни ихтиёрийга ўтказиш керак, дея қайд этилди.
Президент 1995 йилгача қабул қилинган ва ҳозирда эскирган 5236 та стандартларни бекор қилиш, маҳсулот хавфсизлиги бўйича техник регламентларни Европа ва Евроосиё иқтисодий иттифоқи талабларига ммослаштириш тўғрисида кўрсатмалар берди. Шу билан бирга, сифатсиз импорт товарлар кириб келишининг олдини олиш мақсадида хавфсизлик талаблари сони ва қамрови оширилади.
Фото: «Ўзбекистон 24».
Президент «Ўзстандарт» агентлиги олдига Европа иқтисодий комиссияси техник қўмитаси билан қуритилган мевалар бўйича келишувга эришиш, келгуси йилда Халқаро аккредитация форумига тўлақонли аъзо бўлиш вазифасини қўйди. Бундан ташқари, қовун-тарвуз, қизилмия, шунингдек, қоракўл мўйналари учун халқаро стандартларни қўлга киритиш вазифалари белгилаб қўйилди.
