Қозоғистонда ўлим жазоси бекор қилинди. Олдинроқ мамлакатда ушбу жазони қўллаш тўхтатиб қўйилган эди. Бу ҳақда Tengrinews.kz Қозоғистон ТИВига таяниб хабар берди.
Маълумотга кўра, Қозоғистон ўлим жазосини бекор қилиш бўйича халқаро протоколга қўшилган. Тегишли ҳужжат Қозоғистоннинг БМТдаги доимий вакили Қайрат Умаров томонидан Бирлашган Миллатлар Ташкилотининг бош қароргоҳида имзоланди.
Мамлакат президенти Қосим Жомарт Тоқаев ушбу қарор ҳақида БМТ Бош Ассамблеясининг 75-сессиясидаги чиқишида маълум қилиб, мамлакат инсоннинг ҳаётга бўлган ҳуқуқини таъминлашни мақсад қилиб қўйганини айтган эди.
Қозоғистонда ўлим жазосини белгилаш 2003 йилда мамлакат президенти қарори билан тўхтатиб қўйилган эди.
Маълумот учун, Ўзбекистонда ўлим жазоси 2008 йил 1 январдан бошлаб президент қарори билан бекор қилинган.
