Нурсултонда суд Қозоғистон Ташқи ишлар вазирлигининг собиқ масъул котиби Анарбек Карашевга қарши ҳукм чиқарди. Шунингдек, Қозоғистоннинг Ўзбекистондаги собиқ элчиси Ерик Утембаев ҳам судланди, дея хабар берди Tengrinews.kz.

Қайд этилишича, дастлаб Карашевнинг ҳаракатларига элчихона биноси қурилишига ажратилган маблағларни талон-торож қилишдан иборат, деб баҳо берилган эди. Бироқ суд тергови жараёнида айблов ваколатни суиистеъмол қилиш деб қайта малакаланган .

Прокурорнинг талқини бўйича, Анарбек Карашевнинг шериги собиқ элчи Ерик Утембаев бўлган.

Суд Анарбек Карашев ва Ерик Утембаевнинг биринчи марта жиноий жавобгарликка тортилаётгани ҳамда қарамоғида вояга етмаган фарзандлари борлигини ҳисобга олди. Уларга икки йиллик озодликни чеклаш (моддада етти йилгача озодликни чеклаш ёки маҳрум этиш кўзда тутилган) жазоси белгиланди. Улар давлат хизматида ишлаш ҳуқуқидан умрбод маҳрум этилди.

Ерик Утембаев 2016 йилда элчи лавозимига тайинланган. Икки йил ўтгач, у вақтинча ўз лавозимидан четлаштирилди. У жуда катта миқдордаги бюджет маблағларини талон-торож қилишда гумонланган. Ўшанда Давлат хизматлари ва коррупцияга қарши курашиш агентлиги Ерик Утембаев масъул лавозимда ишлаб турган ҳолда Қозоғистоннинг Ўзбекистондаги элчихонасининг маъмурий биноси қурилиши бўйича бажарилган ишлар тўғрисидаги сохта ҳужжатларни имзолаганини хабар қилган эди. Тергов органи етказилган зарар 140 млн тенгедан (329 минг долларга яқин — таҳр.) кўпроқни ташкил этганини маълум қилди.