Президент Шавкат Мирзиёев «Ўзбекистон Республикасида идентификация ID-карталарини жорий этиш чора-тадбирлари тўғрисида"ги фармонни имзолади.
Ҳужжатга мувофиқ, 2021 йил 1 январдан мамлакатда шахсни идентификациялашнинг ягона механизми жорий этиш бошланади. Бунда биометрик паспортлар босқичма-босқич элекрон ахборот ташувчи (чип) бўлган ID-карталарга алмаштириш кўзда тутилмоқда. Бу фуқароларга давлат хизматларидан ҳам фойдаланиш имкониятини беради.
ID-карталар фақат Ўзбекистон ҳудудида амал қилади. Мамлакатдан ташқарида саёҳат қилиш учун чет элга чиқишда Ўзбекистон фуқаросининг биометрик паспорти (хорижга чиқиш паспорти) талаб қилинади.
«Ушбу тизим жорий этилгандан сўнг, ID-карталар киритилгандан сўнг, фуқарога нисбатан маълумотларнинг ўзига хослигини таъминлаш мумкин бўлади. ID-карталар ёрдамида соғлиқни сақлаш соҳасида, транспорт, паспорт-виза ҳужжатларини расмийлаштиришда давлат хизматларидан фойдаланиш мумкин. Бу рўйхатни чексиз давом эттириш мумкин», — дея маълум қилди Вазирлар Маҳкамаси ҳузуридаги Персоналлаштириш давлат маркази директори Нажмиддин Тўрахўжаев.
Фармонда Ўзбекистон фуқаролари биометрик паспортлари ҳамда фуқаролиги бўлмаган шахс ва чет давлат фуқароларининг яшаш гувоҳномаларини идентификация ID-карталарига алмаштириш:
- биринчи босқичда 2021 йил 1 январдан 2022 йил 31 декабргача ихтиёрийлик асосида 16 ёшга тўлганда ҳамда қонунчиликда кўзда тутилган бошқа сабабларга кўра;
- иккинчи босқичда 2023 йил 1 январдан 2030 йил 31 декабргача мажбурий тартибда амалга оширилиши белгиланди.
Ўзбекистон фуқаросининг 2011 йилги намунадаги биометрик паспорти 2031 йил 1 январдан бошлаб ҳақиқий эмас деб ҳисобланади.
ID -карталарни бериш шартлари:
- бир ёшга тўлмаган янги туғилган бола учун — 2 йил муддатга (ота-оналарнинг, васийларнинг қарорига биноан);
- 1 ёшдан 16 ёшгача бўлган шахслар — 5 йил муддатга (ота-оналар, васийлар, ҳомийларнинг қарорига биноан);
- 16 ёшдан — 10 йил муддатга (Ўзбекистон ҳудудида доимий яшайдиган чет эл фуқаролари ва 16 ёшдан 60 ёшгача бўлган фуқаролиги бўлмаган шахслар учун — 5 йил муддатга).
ID-картани расмийлаштириш ва олиш учун фуқаролик паспортини, чет эл фуқароларига эса яшаш учун рухсатномани олиш учун зарур бўлган ҳужжатлар, шунингдек, туғилганлик тўғрисидаги гувоҳномани тақдим этиш керак бўлади. Идентификация картасини олиш тўғрисидаги аризани шахсан тақдим этиш ёки уни интерне орқали юбориш мумкин, дея қайд этди «Ўзбекистон 24» телеканали.
Вазирлар Маҳкамаси ҳузуридаги Персоналлаштириш давлат маркази директори Нажмиддин Тўрахўжаевнинг қайд этишича, ҳужжатни 1 кун ичида (ҳозирда паспортни 10 кунда) олиш мумкин бўлади.
Унинг сўзларига кўра, ҳужжат ва чип тегишли хавфсизлик сертификатлари ва электрон рақамли имзо билан ҳимояланади.
Идентификация картасида эгасининг биографик маълумотлари, рақамли фотосуратлари, бармоқ излари (16 ёшга тўлганида) ва электрон рақамли имзо калитининг сертификати (16 ёшга тўлганда) сақланади. Шу билан бирга, эгасининг миллати тўғрисидаги маълумотлар идентификация картасининг чипига ID-карта шаклида кўрсатилмасдан киритилади, дейилади «Ўзбекистон 24» хабарида.
Миллий паспорт ўрнини эгаллайдиган ID-карталарни олиш учун давлат божи базавий ҳисоблаш миқдорининг 89 фоизи миқдорида этиб белгиланади (2020 йил 22 сентябрь ҳолатига 198470 сўм).
Тегишли вазирлик ва идораларга 2020 йил 31 декабрга қадар:
- Ягона интерактив давлат хизматлари порталида идентификация ID-картасини олиш учун мурожаат қилиш, электрон навбатга туриш ва онлайн тўловни амалга ошириш имконияти жорий этилишини;
- идентификация ID-картасини олиш учун мурожаат этилганда туғилганлик ҳақидаги гувоҳнома «Фуқаролик ҳолати далолатномаларини ёзиш органларининг ягона электрон архиви» ахборот тизими орқали олинишини таъминлаш;
- «Электрон ҳукумат» тизимини модернизация қилиш;
- идентификация ID-карталарини Ўзбекистонда жорий қилиш билан боғлиқ чора-тадбирларни назарда тутувчи Концепция ва уни амалга ошириш «Йўл харитаси» лойиҳаларини ишлаб чиқиш топширилди.
