Deutsche Bank мутахассислари 2021 йил ўрталарига келиб глобал ялпи ички маҳсулот кўрсаткичининг пандемиягача бўлган давр даражасига тикланишини тахмин қилишмоқда. Сўнгги ойлардаги сезиларли иқтисодий тикланишдан сўнг бу суръатнинг тезлашуви кутилмоқда, дея хабар берди The Bell, Reuters га асосланиб.
Deutsche Bank янги ҳисоботида ёзилишича, глобал ЯИМ даражаси, учинчи чорак якунларига кўра, пандемиягача бўлган даврдаги кўрсаткичларнинг деярли ярмига тенг. «Энди биз иқтисодий тикланишни келгуси йилнинг ўрталарида, яъни аввалги прогнозимизга қараганда икки чорак олдин якунлашини кўряпмиз», — дея таъкидлашди мутахассислар.
Deutsche Bank глобал ЯИМ бўйича прогнозини ўзгартириб, бу йил ҳисобига кўра, кутилаётган пасайиш 3,9 фоизни ташкил этишини маълум қилди. Май ойида пасайиш 5,9 фоиз деб баҳоланган эди. Иқтисодчилар 2021 йил давомида ўсиш прогнозини 5,3% дан 5,6% гача кўтаришди. Банкнинг прогнози оптимистик. Ваҳоланки аввалроқ Германия иқтисодиёт вазири мамлакат ялпи ички маҳсулоти 2022 йилгача инқирозгача бўлган даражага кўтарилишини кутмаётганини айтган эди.
Экспертлар томонидан қайта тикланишга ҳалақит берувчи омиллар рўйхатига коронавируснинг иккинчи тўлқини, АҚШ президентлиги сайловлари натижалари, Brexit ва марказий банкларнинг пул-кредит сиёсати борасидаги ноаниқликлар киритилган.
Июнь ойида Жаҳон банки 2020 йилда глобал иқтисодий ўсишнинг 5,2 фоизга пасайишини прогноз қилган эди. Мутахассисларнинг таъкидлашларича, инқироз Иккинчи Жаҳон урушидан кейинги энг чуқур инқирозга айланади.
