Январь-август ойлари оралиғида Ўзбекистонга хориждан 1,7 млн АҚШ доллари эвазига 73 та электромобиль олиб келинган. Бу кўрсаткич ўтган йилнинг шу даври билан солиштирилганда 53 тага кўп, дея хабар берди Давлат статистика қўмитаси матбуот котиби Усмон Абдурасулов.
Қўмита маълумотларига кўра, бу йил Хитойдан — 50 та, Корея Республикасидан — 12 та ҳамда Германия, Бирлашган Араб Амирликлари, Россия ва Грузия каби давлатлардан 11 та электромобиль импорт қилинган.
Йилнинг дастлабки саккиз ойи давомида Ўзбекистонга 111 млн долларлик миқдорда автомобиллар импорт қилинган, бу ўтган йилга нисбатан 59,3 фоизга кўпдир.
Эслатиб ўтамиз, 2019 йил 1 январдан импорт қилинган электромобиллар импорт божларидан, июль ойидан бошлаб эса акциз солиғидан озод қилинди. Январь ойидан бошлаб ҳукумат электромобилларга 10% бож жорий этишни режалаштирган эди, аммо охир-оқибат бу ғоядан воз кечилди.
