Урганчда халқаро Binary (Малайзия) университети филиали ташкил этилди, дея хабар қилди Адлия вазирлиги матбуот хизмати. 17 сентябрь куни Вазирлар Маҳкамасининг бу ҳақдаги тегишли қарори имзоланди.
Қарорга мувофиқ, тадбиркорлик ва бошқарув, ижтимоий-иқтисодий ҳамда иқтисодиётнинг эҳтиёж юқори бўлган бошқа соҳалари бўйича малакали олий маълумотли кадрларни тайёрлаш Филиалнинг асосий вазифа ва фаолият йўналишларидан бири ҳисобланади.
Филиал нодавлат олий таълим ташкилоти бўлиб, ўқиш инглиз, рус ва ўзбек тилларида тўлов-контракт асосида амалга оширилади.
Филиалда бакалавриатнинг кундузги ва сиртқи таълим шакллари ҳамда магистратура бўйича кадрлар тайёрланади.
Филиалнинг ҳар йилги қабул параметрларининг 5 фоизидан кам бўлмаган қисми ижтимоий ҳимояга муҳтож оилаларнинг қобилиятли, иқтидорли ҳамда ўзлаштириш кўрсаткичлари юқори бўлган фарзандлари орасидан танлов асосида абитуриентларни бепул (Филиал гранти асосида) ўқишга қабул қилиш учун ажратилади.
Шунингдек, Филиалда профессор-ўқитувчилар таркибининг 40 фоизидан кам бўлмаган қисми малакали хорижий профессор-ўқитувчилар билан тўлдирилади.
Филиал битирувчиларига Ўзбекистон ва Малайзияда олий таълим тўғрисидаги ҳужжат сифатида тан олинадиган Университетнинг белгиланган намунадаги дипломи берилади.
Хоразмда Binary филиалини очиш тўғрисидаги уч томонлама шартнома 3 июнь куни онлайн маросимда имзоланган эди. 2019 йил мартида эса Тошкент молия институтида Binary университети билан ҳамкорликда «Binary Graduate School» қўшма факультети ташкил этилган эди.
Маълумот учун, Binary хусусий ОТМ бўлиб, 1984 йилда ташкил этилган. Университет менежмент, ахборот технологиялари ва тадбиркорлик таълими соҳаларига ихтисослашган.
