Владимир Путин ва Александр Лукашенко Россиянинг Сочи шаҳрида учрашишди
Россия президенти Владимир Путин ва Беларусь президенти Александр Лукашенко 14 сентябрь куни Сочи шаҳрида музокаралар ўтказишди. Учрашув тўрт соатдан кўпроқ давом этиб, «тет-а-тет» (юзма-юз) форматида бўлиб ўтди. Россия раҳбари Лукашенкони президентликка қайта сайлангани билан яна бир бор табриклади. Владимир Путин сайловдан кейин бошланган норозиликларга фикр билдириб, «беларусларнинг ўзлари, ташқаридан ҳеч қандай ундов ёки босимларсиз» вазиятни тартибга солиши кераклигини айтди. Россия Беларусни «ҳозирги қийин пайтда» 1,5 млрд долларлик кредити билан таъминлайди. Ўз навбатида, Александр Лукашенко Владимир Путин ва рус халқига президентлик сайловларидан сўнг қўллаб-қувватлаганликлари учун миннатдорчилик билдирди. «Бу нафақат Беларусь ва Россия учун, балки собиқ совет республикалари учун ҳам сабоқ бўлиши керак», ― дея таъкидлади Беларусь президенти. — Газета.uz
Ривожланган давлатлар иқтисодиёти мисли кўрилмаган даражада қулади
Фото: g20.org
2020 йил иккинчи чорагида G20 мамлакатлари ялпи ички маҳсулоти коронавирус пандемияси туфайли аввалги уч ойга нисбатан мисли кўрилмаган даражада, яъни 6,9 фоизга тушиб кетди. G20 мамлакатлари орасида Хитой ЯИМниниг ўсиши қайд этилган ягона давлатга айланди (11,5 фоиз). Энг кўп зарар Ҳиндистон иқтисодиётига тўғри келиб, унинг кўрсаткичи 25,2 фоизга тушиб кетди. Буюк Британияда эса пасайиш 20,4 фоизни ташкил қилди. Жанубий Корея ва Россияда ЯИМнинг пасайиши унчалик сезиларли бўлмаган. Ҳар икки мамлакатда ҳам пасайиш 3,2 фоизни ташкил этди. Moody’s рейтинг агентлигининг башоратларига кўра, бу йил G20 мамлакатларидаги умумий иқтисодий пасайиш 4,6 фоизни ташкил этади. Шу билан бирга, Бразилия, Ҳиндистон ва Жанубий Aфрикада коронавирус пандемиясидан сўнг тикланиш борасида энг катта муаммолар юзага келиш эҳтимоли катта, дейди мутахассислар. — Интерфакс.
Европа Иттифоқи Лукашенконинг сайловларда қонуний ғолиб бўлганлигини тан олмади
Европа Иттифоқи Aлександр Лукашенкони Беларуснинг қонуний президенти сифатида тан олмади. Европа Иттифоқи дипломатияси раҳбари Жосеп Боррелнинг таъкидлашича, Европа парламенти август ойида бўлиб ўтган сайловлар сохталаштирилган деб ҳисоблашда давом этмоқда. «Биз 9 август куни бўлиб ўтган сайловларни қалбакилаштирилган деб биламиз … Биз Лукашенкони Беларуснинг қонуний президенти деб тан олмаймиз», ― деди у. Шу билан бирга, дастлаб Лукашенко ҳақида гапирганда, Боррель янглишиб, Беларусни Украина деб атади. — РИА Новости.
Алексей Навальний комадан кейин биринчи суратини эълон қилди
Фото: instagram.com/navalny
Ҳозирда Берлиндаги «Шарите» касалхонасида даволанаётган Алексей Навальний, комадан чиққанидан сўнг ўзининг шахсий Instagram саҳифасида биринчи суратини эълон қилди. «Мен ҳозир ҳам деярли ҳеч нарса қилолмаяпман, лекин кеча кун давомида ўзим нафас олдим. Фақат ўзим. Ҳеч қандай ёрдамсиз…» — Instagramсаҳифасидан.
TikTok эгалари АҚШ ва бошқа мамлакатларда бизнесини сотишдан бош тортишди
Фото: fb.com/tiktok
TikTokга эгалик қилувчи Хитойнинг ByteDance компанияси Microsoft га ўзининг АҚШ, Канада, Австралия ва Янги Зеландиядаги сегментини сотишдан бош тортди. ByteDance компанияси Oracle корпорацияси билан шартнома тузди. Корпорация билан ҳамкорлик уларга кейинчалик АҚШда фаолият юритишга тақиқдан сақланишга ёрдам беради деб умид қилишмоқда. ByteDance томонидан АҚШ молия вазирлигига юборилган битимда, Oracle компанияси «ишончли технологик шерик» вазифасини бажариши белгиланган. — Газета.uz
