Наманганда икки нафар эркакни дўппослаган қизга нисбатан очилган жиноят иши тугатилди, дея хабар берди Наманган вилояти ИИБ Ахборот хизмати.
Аввалроқ, 25 июнь куни Наманган вилояти Норин туманида 23 ёшли қиз икки нафар эркак кишини дўппослагани ҳақида ва унга нисбатан жиноят иши қўзғатилгани ҳақида хабар берган эдик. Кейинчалик, наманганлик қиз ўз шаънини ҳимоя қилганини, эркаклар уни масхаралаб, онасини сўкканини айтган эди.
Гулсанам Алижонованинг жиноят иши юзасидан Ёшлар ишлари агентлиги Наманган вилоят бошқармаси томонидан вилоят прокуратурасига жазони енгиллаштириш бўйича амалий ёрдам сўраб мурожаат этилган.
Шунингдек, Ёшлар иттифоқи Норин туман кенгаши Гулсанамнинг жамоат ишларида фаоллиги, 2019 йилдан буён волонтёр (кўнгилли хизматчи) сифатида фаолият юритиши ва спортдаги ютуқларини инобатга олиб, қайта жиноят содир этмаслиги бўйича кафилликка олган.
Шунга кўра Норин туман ИИБ ҳузуридаги ТБ томонидан ЖПКнинг 84-моддаси, 5-қисми, 2-бандига асосан, Гулсанам Алижонованинг муқаддам судланмаганлиги, қилган ишидан пушаймонлиги, жабрланувчиларнинг даъвоси йўқлиги, содир этган ҳаракати унча оғир бўлмаган жиноятлар турига кириши, шунингдек, Ёшлар иттифоқи кафиллигини инобатга олиб, айблилик тўғрисидаги масалани ҳал қилмай туриб, жиноят ишини тугатиш тўғрисида қарор қабул қилинган.
