14 сентябр куни Жиноят ишлари бўйича Яккасарой туман судида Korean and Migrations xususiy bandlik agentligi хусусий бандлик агентлиги иши бўйича очиқ суд жараёни якунланди, деб хабар қилди Олий суд матбуот хизмати.
Судя Тимур Қосимов судланувчиларни 168-модда 4-қисм «а», «к» бандлари (фирибгарлик, жуда кўп миқдорда; уюшган гуруҳ томонидан ёки унинг манфаатларини кўзлаб содир этилган бўлса), 228-модда иккинчи қисми «б» банди (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш, бир гуруҳ шахслар томонидан олдиндан тил бириктириб содир этилган бўлса) ҳамда 228-модда 3-қисмида (била туриб қалбаки ҳужжатдан фойдаланиш) кўзда тутилган жиноятларни содир этганликда айбдор деб топди. Бундан ташқари, жиноятчиларга моддий зарарларни қоплаш тўғрисида ҳам кўрсатма берилган.
Шундай қилиб, Қаҳрамон Отақулов (1979 йилда Бухоро вилоятида туғилган, илгари судланган, агентлик директори) ва Одил Қобилов (1963 йилда Наманган вилоятида туғилган, илгари судланган, агентликнинг Наманган вилоят бўлими директори) 9 йиллик қамоқ жазосини олишди. Тайинланган жазони умумий тартибли колонияларда ўташ белгиланди. Шунингдек, улар 3 йил муддатга раҳбарлик ва моддий жавобгарлик лавозимларини эгаллаш ҳуқуқидан маҳрум бўлишди.
Хушвакт Турдиев (1973, Қашқадарё вилоятида туғилган, илгари судланмаган, агентлик асосчиси), Мусурмон Алиқулов (1970, Қашқадарё вилоятида туғилган, илгари судланмаган, ўқув ишлари бўйича директор), Анваржон Шамшиддинов (1983, Наманган вилоятида туғилган, илгари судланган, Наманган вилоят филиали ходими) ва Орифжон Жўраев (1983 йилда Наманган вилоятида туғилган, илгари судланмаган, Наманган вилоят филиалининг кассири) 8 йил 3 ойга озодликдан маҳрум қилинди. Тайинланган жазони умумий тартибли колонияларда ўташ белгиланди. Шунингдек, уларга уч йил давомида раҳбарлик ва моддий жавобгарлик лавозимларида ишлаш тақиқланади.
Мавлуда Отажонова (1969 йилда Самарқанд вилоятида туғилган, илгари судланган, бухгалтер) 5 йил 9 ой 21 кунга 3 йиллик синов муддати билан шартли қамоқ жазосига маҳкум этилди. Шунингдек, унга 3 йил муддатга раҳбарлик ва моддий жавобгарлик лавозимларида ишлаш тақиқланади.
Раъно Нуралиева (1976 йил, Қашқадарё вилоятида туғилган, илгари судланмаган, кадрлар бўлими инспектори) ва Ирода Жабборовага (1986 йилда Қашқадарё вилоятида туғилган, илгари судланмаган, агент) узил-кесил ўташ учун 3 йил муддатга мансабдорлик ва моддий жавобгарлик лавозимларда ишлаш ҳуқуқидан маҳрум қилиб, 6 йил 1 ой муддатга озодликдан маҳрум қилиш жазоси тайинланди ҳамда тайинланган жазо шартли ҳисобланиб, 3 йил синов муддати белгиланди.
Канг Нам Кюга (1968 йилда туғилган, Корея Республикасида туғилган, илгари судланган, Korean and migrations шериги) узил-кесил ўташ учун 3 йил муддатга мансабдорлик ва моддий жавобгарлик лавозимларда ишлаш ҳуқуқидан маҳрум қилиб, 8 йил 6 ой муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди. У юқорида келтирилган ЖК моддаларидан ташқари, 228-моддаси 2-қисми «а» банди (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш такроран ёки хавфли рецидивист томонидан содир этилган бўлса) билан ҳам айбдор деб топилди. Бундан ташқари, айбдорга етказилган моддий зарарни қоплаш ҳам топширилди.
Жалол Хидиров (1987 йилда Самарқанд вилоятида туғилган, илгари судланмаган, воситачи) ЖКнинг 168-моддаси 3-қисми «а», «б» бандлари билан айбдор деб топилди. Унга 6 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
Фурқат Камолов (1970 йилда Тошкент вилоятида туғилган, илгари судланган, воситачи) эса Жкнинг 168-моддаси 3-қисми «б» банди билан айбдор деб топилди. Унга узил-кесил ўташ учун 6 йил 6 ой муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланди.
Олий суд веб-сайтидаги суд мажлислари жадвалига кўра, 1912 киши иш бўйича жабрланувчи бўлди.
Эслатиб ўтамиз, ушбу иш бўйича суд жараёни 2 июнь куни, дастлабки тергов эса март ойида бошланган эди. Жами 2372 нафар фуқаро жабрланувчи ва фуқаролик даъвогари деб тан олинди, уларга етказилган моддий зарар 24,2 млрд сўмдан ошади.
