Наманган вилоятида икки эркакни дўппослаганликда айбланаётган Гулсанам Алижонова ўз шаънини ҳимоя қилганини айтмоқда. Daryo нашри қиз билан суҳбатлашиб, ўша куни нималар содир бўлганига аниқлик киритди.

Гулсанам Алижонованинг сўзларига кўра, воқеа 2020 йил 25 июнь куни содир бўлган.

«Андижонга турмушга чиққан опамни кузатгани боргандим. Қўлимда унинг 10 ойлик чақалоғи, сумкалари бор эди. Опам таксичи билан гаплашаётганди. Шу пайт ёнимизга Spark машинаси яқинлашди. Унинг ичидаги йигитлардан бири футболка ва шортикда бўлганим учун масхаромуз қилиқ қилди. Қилиғига яраша жавоб бердим. Шунда у сўкиниб ўтиб кетди, буни опам ҳам эшитди. Гаплашилаётган такси машинасида ортидан етиб бордик».

Унинг айтишича, сўкинган йигитнинг олдига бориб, тортишиб турса, футболкасига ёпишди. Шундан кейин муштлашув бошланиб кетган. Улардан бири гўё ажратмоқчи бўлиб, қизга қапишиб олган, қиз эса унга ҳам жавоб қайтарган. Шундан кейин уларнинг иккиси икки томонга қараб кетган.

Гулсанам машинада қолган йигитлар ҳайдовчини ўртага олиб, дўппослаётганини маълум қилди.

«Бизни кўриб, машинага ўтириб, кетиб юборишди. Опам бўлган ҳолатни телефонига олганди. Таксичи ака „буни бўлган ишнинг гувоҳлиги сифатида жиянимга ҳам ўтказиб беринг“ деганди. Шундан сўнг видео тарқалиб кетди», — дейди Гулсанам.

Гулсанам 23 ёшда, ҳозирда Наманган давлат университетининг жисмоний маданият йўналиши сиртқи бўлимида, 3-босқичда таҳсил олади. Оилада 6 нафар фарзанднинг кенжаси. Бокс, каратэ билан шуғулланган. Икки йилдан бери таэквондо WTF бўйича машғулотларга қатнаб келади. Шу йўналишда Ўзбекистон биринчилиги совриндори, Наманган опен турнири ғолиби. 2020 йил баҳор ойида Туркияда бўлиб ўтган халқаро мусобақа иштирокчиси.

«Спортчиман, мен ҳозирда шуғулланаётган спорт тури аслида совуққонликка, ўзини ирода қилишга ўргатади. Лекин ойимдан кетиб сўкинишларига чидолмадим. Онам ўзи анчадан бери хасталикдан қийналадилар, шу ботди шекилли», — дейди Гулсанам.

Фото: Тоирбек Комилжонов

Гулсанам кейинги пайтларда волонтёрликда ҳам ўзини синаб кўрмоқда. Норин тумани ҳомийлик хайрияларини мувофиқлаштириш марказида мурожаатларни қабул қилиш, рўйхатга олиш, озиқ-овқат маҳсулотларини эҳтиёжманд оилаларга етказиш билан машғул бўлган.

«Ҳисоблаб кўрсам, пандемия бошланганидан бери тумандаги 500 га яқин хонадонга кириб чиқибман. Бундай эзгу ишлардан, кўпчиликка нафим тегаётганидан, уларнинг дуоларини олаётганимдан қувонаман. Фақат мана бу бўлиб ўтган кўнгилсиз ишлар мени ҳам, уйдагиларни ҳам анча толиқтирди», — дейди у.

Эслатиб ўтамиз, ИИВ ҳузуридаги Тергов департаменти қизга нисбатан Жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилганини хабар берган эди. Департамент хабарида можаро ҳеч бир сабабсиз келиб чиққани айтилган эди.