Ўзбекистон президенти Шавкат Мирзёев «Республика озиқ-овқат саноатини жадал ривожлантириш ҳамда аҳолини сифатли озиқ-овқат маҳсулотлари билан тўлақонли таъминлашга доир чора-тадбирлар тўғрисида"ги қарорни имзолади.

Ҳужжатга мувофиқ, «Ўзбекозиқовқатхолдинг» холдинг компанияси тугатилмоқда. Холдинг 2016 йил февралида Ўзбекистон Озиқ-овқат саноати корхоналари уюшмаси ўрнига ташкил этилган эди. Президентнинг ўтган йил январидаги қарори билан икки ой муддат ичида «Ўзбекозиқовқатхолдинг» холдинг компаниясини тугатиш ва унинг ўрнига озиқ-овқат саноати соҳасида ўзини ўзи бошқарувчи ташкилот тузиш кўзда тутилган эди.

Қишлоқ хўжалиги вазирлиги марказий аппарати тузилмасида Қишлоқ хўжалиги маҳсулотларини қайта ишлаш ва инфратузилмани ривожлантириш бошқармаси (4 та штат) негизида бошқарув ходимларининг чекланган сони 12 та штат бирлигидан иборат Озиқ-овқат саноатини ривожлантириш бош бошқармаси ташкил этилди. Қишлоқ хўжалиги вазири ўринбосари — Озиқ-овқат саноатини ривожлантириш бош бошқармаси бошлиғи лавозими жорий қилинди.

Қишлоқ хўжалиги вазирлигига озиқ-овқат саноатини ривожлантириш бўйича қўшимча вазифалар юкланди.

Озиқ-овқат саноатини ривожлантириш мақсадида Қишлоқ хўжалиги вазирлигининг Қишлоқ хўжалигини ривожлантириш ва озиқ-овқат таъминоти жамғармаси маблағлари ҳисобидан:

озиқ-овқат маҳсулотларини ишлаб чиқариш бўйича илк маротаба ташкил этилаётган истиқболли лойиҳаларнинг техник-иқтисодий асосланишини тайёрлаш билан боғлиқ харажатларнинг 50 фоизини, лекин ҳар бир лойиҳа учун 100 млн сўмдан кўп бўлмаган миқдорда қоплаш;

озиқ-овқат маҳсулотларини ишлаб чиқариш бўйича илк маротаба ташкил этилаётган истиқболли лойиҳаларнинг инфратузилмасини таъминлаш билан боғлиқ харажатларнинг 50 фоизини, лекин ҳар бир лойиҳа учун 100 млн сўмдан кўп бўлмаган миқдорда қоплаш;

озиқ-овқат маҳсулотларини етиштириш ва уларни чуқур қайта ишлаш соҳасига хорижий экспертларни жалб қилиш билан боғлиқ харажатларнинг 50 фоизини, лекин ҳар бир лойиҳа учун 50 млн сўмдан кўп бўлмаган миқдорда қоплаш белгиланди.

2021−2023 йилларга мўлжалланган саноатбоп қишлоқ хўжалиги маҳсулотлари етиштиришни кенгайтириш дастури шакллантирилади.

Кадрларга бўлган эҳтиёжлар асосида 2021/2022 ўқув йилидан бошлаб республика олий таълим муассасаларининг «Озиқ-овқат технологияси» ҳамда «Қишлоқ хўжалиги маҳсулотларини сақлаш ва дастлабки ишлаш технологияси» каби таълим йўналишлари бўйича бакалавриатнинг кундузги ва сиртқи таълим шаклларига ўқишга қабул қилишнинг давлат буюртмаси параметрлари босқичма-босқич ошириб борилади.