Ўзбекистон Россияда ишлаб чиқарилган коронавирусга қарши вакциналарни сотиб олиш ва авиақатновларни тиклаш бўйича имкониятларни ўрганиб чиқмоқда. Бу ҳақда санитария-эпидемиологик осойишталик агентлиги директори, соғлиқни сақлаш вазирининг биринчи ўринбосари Баҳодир Юсупалиев Россиянинг «Коммерсантъ» нашрига берган интервьюсида маълум қилди.

Соғлиқни сақлаш вазирининг биринчи ўринбосари таъкидлашича, Хитой ҳамда бошқа давлатлар Ўзбекистонни коронавирусга қарши вакциналар клиник синовининг учинчи босқичида қатнашиш учун таклиф қилган. Ҳозирда учинчи босқичда қатнашиш ёки синовларнинг муваффақиятли якунланганидан кейин вакциналарни сотиб олиш масалалари муҳокама қилинмоқда.

«Биз аҳолини эмлаш учун дори воситаларини ўз вақтида сотиб олишга тайёрмиз, ва бунда вакциналарнинг хавфсизлиги ва самарадорлиги катта аҳамиятга эга» — деди Баҳодир Юсупалиев.

Унинг айтишича, Россияда ишлаб чиқарилган вакцина ҳам кўриб чиқилмоқда. «Биз у (вакцина — таҳр.) Россияда рўйхатдан ўтганлигини ва клиник синовларнинг учинчи босқичида эканлигини биламиз», — деди вазир ўринбосари. Баҳодир Юсупалиев бу борадаги муҳокамалар мутахассислар ва ҳукумат томонидан олиб борилаётганини, икки ҳафталардан кейин қандайдир қарорга келиниши мумкинлиги ҳақида айтиб ўтди.

Бундан ташқари, Россия билан авиақатновлар қачон тикланиши мумкинлиги тўғрисидаги саволга, вазир ўринбосари сентябрда ҳам тикланиши эҳтимоли мавжудлигини таъкидлади: «Агар касалланиш ҳолатлари камайиб борса, бу авиақатновларнинг тикланишига олиб келади».

Баҳодир Юсупалиев коронавируснинг иккинчи тўлқинига ҳам тайёргарлик кўрилаётганини таъкидлаб ўтди. «Биз кутяпмиз ва тайёрланаяпмиз. Куз-қиш мавсуми — бу бошқа инфекциялар ҳам уйғонадиган давр, грипп ва ОРВИ ҳам шулар жумласидан. Деярли барча карантин чоралари юмшатилган, аҳоли орасидаги контаклар кўпаймоқда, мактаблар, боғчалар ва олийгоҳлар очилмоқда».

Август ойининг бошида президент Шавкат Мирзиёев бош вазир ўринбосари Беҳзод Мусаевга бир ҳафта муддатда етакчи олимлар ва тажрибали шифокорлар билан маслаҳатлашган ҳолда, вакцинани харид қилиш ва мамлакат аҳолиси вакцинациясини амалга ошириш йўлларини пухта ўрганиб чиқиш топшириғини берган эди.

Олдинроқ, кўплаб фармкомпаниялар Россия соғлиқни сақлаш вазирлигини клиник синовларнинг учинчи босқичида бўлган вакцинани рўйхатдан ўтказишга шошмасликка чақираётган эди. Улар соғлиқни сақлаш вазирлиги вакцинанинг сўнгги клиник синовлардан муваффақиятли ўтишини кутиши кераклигини таъкидлашди.