Россия билан авиақатновларни тиклашдан олдин мамлакатдаги эпидемиологик ҳолатни баҳолаш учун вақт талаб этилади. Бу ҳақда соғлиқни сақлаш вазирининг биринчи ўринбосари, санитария-эпидемиологик осойишталик агентлиги директори Баҳодир Юсупалиев Россиянинг «Коммерсантъ» нашрига берган интервьюсида маълум қилди.
«Бизда қайси хорижий давлатларда камроқ янги ҳолатлар аниқланаётганлиги ва қаерда касалланганлар бўйича аниқ маълумот бўлиши учун ПЗР-текширувлари жиддий ўтказилаётганлигини аниқлайдиган низом бор. Ушбу таҳлилга асосланиб, авиақатновларни очиш бўйича қарор қабул қиламиз. Бу динамик жараён, ўйлашимча, кейинчалик чегаралар кенгроқ очилади», — деди у.
Баҳодир Юсупалиев Россия билан авиақатновлар сентябрь ойида очилиш эҳтимоли борлигини айтиб ўтди, лекин 5 сентябрдан карантин чоралари юмшатилганидан кейин ҳолатни баҳолаш учун вақт кераклигини тушунтирди.
«Балким сентябрь ойида ҳам очармиз. Лекин тушунинг, биз 15 майдан икки ой карантин қилдик, кейин чоралар юмшатилди, ва оқибатда касалланиш ҳолатлари ошиб кетди ва 15 августгача яна карантин эълон қилишга мажбур бўлдик. 15 августдан у озгина юмшатилди, 5 сентябрдан эса янги юмшатишлар киритилди. Биз барча давлатлар каби мактабларни ва мактабгача муассасаларни очяпмиз. Ва бизга республикадаги вазиятга баҳо бериш учун вақт керак. Агар касалланиш ҳолатлари камайиб борса, бу авиақатновларнинг тикланишига олиб келади», — дея таъкидлади санитария-эпидемиологик осойишталик агентлиги директори.
Олдинроқ Баҳодир Юсупалиев Ўзбекистон бошқа давлатларда ишлаб чиқарилган коронавирусга қарши вакциналар клиник синовларининг учинчи босқичида қатнашиш ёки синовлардан муваффақиятли ўтган вакциналарни сотиб олиш имкониятларини ўрганиб чиқаётганлиги ҳақида маълумот берган эди.
3 сентябрь куни Uzbekistan Airways Дубай, Франкфурт, Истанбул, Олмаота ва Бишкек шаҳарларига доимий авиақтновларни тиклаганлиги ҳақида хабар берилган эди.
