Ихтирочи Никола Тесланинг номи билан аталган Nikola компанияси электр юк машиналари стартапидан йирик автомобилсозлик саноатига айланди.
Бу йил июнь ойининг бошида IPO (бирламчи оммавий таклиф) ўтказилгандан бери 5 кун ичида Nikola компаниясининг бозор қиймати деярли 30 млрд долларга етди, бундай ўсиш Ford ва Fiat-Chrysler брендларининг кўрсаткичларига қараганда кўпроқ. Лекин Nikola автомобиль ишлаб чиқаришни ҳали бошлагани йўқ.
Компания асосчиси Трэвор Милтон ўз тадбиркорлик фаолиятини суюлтирилган ва сиқилган табиий газни сақлаш баллонларини ишлаб чиқаришдан бошлаган. Кейинчалик Милтон оғир юк машиналарининг двигателларини табиий газга ўтказадиган dHybrid Systems компаниясига асос солади. 2014 йилда Милтон Юта штатининг пойтахти Солт-Лэйк-Сити шаҳрида Nikola Motor компаниясини ташкил этади. Компания юк машиналарини ишлаб чиқаришга ихтисослашади.
Милтон ўз бизнесини юк машиналарини ишлаб чиқариш билан бошлаганлигига бундай изоҳ берди: — «Сизларга ростини айтганда, юк машиналарини сотишда жуда кўп пул топса бўлади, енгил машиналарда деярли пул йўқ. Шунинг учун биз юк ташишни яхши кўрамиз».
Nikola юк машиналарида батареянинг хажмини камайтириш орқали машинанинг умумий оғирлиги ҳам камаяди. Бунда транспорт воситаси кўпроқ юк ташиш имкониятига эга бўлади, дейилади компания маълумотларида.
Nikola машиналарида электр моторнинг ишлаш жараёни шундаки, электр токи машинанинг ўзида водород ва кислороднинг кимёвий реакцияси орқали ҳосил бўлади. Яъни, машина фақат водород билан тўлдирилади.
Компаниянинг «One» номли илк юк машинасининг прототипи 2016 йилда тақдим этилган. Сўнгра, 2017 йилда «Two» номли ва 2018 йилда «Tre» номли минтақавий юк ташиш машиналарининг моделлари намойиш этилди.
Фото: Nikola One / nikolamotor.com
Фото: Nikola Tre / nikolamotor.com
2020 йил февраль ойида компания «Nikola Badger» пикапининг компютер моделини тақдим этди. Ушбу модель кўпчиллик томонидан Tesla Cybertruck машинасининг асосий рақиби сифатида баҳоланди.
Фото: Nikola Badger / nikolamotor.com
Милтоннинг сўзларига кўра, Nikola юк машиналаринг ишлаб чиқарилиши камида 2024 йилдан бошланади. Ҳозирда DAF, Daimler, Kenworth, Peterbilt, Toyota ва Volvo компаниялари ҳам электр юк машиналари устида ишлашмоқда.
